O Colexio de Enfermaría de Pontevedra, intervido por un xuíz e co presidente imputado, celebra asemblea
O secretario do organismo e a asociación Enfermeiras de Pontevedra denuncian "obstrucionismo" e esixen eleccións á directiva.
Por Europa Press / Redacción | VIGO | 15/12/2021 | Actualizada ás 18:45
O Colexio de Enfermaría de Pontevedra, que se atopa intervido xudicialmente despois da detención do seu presidente, a súa muller e a súa filla (investigados por presunta administración desleal, branqueo e falsidade documental vinculados á xestión do Colexio), celebrará este xoves asemblea xeral, no medio dun clima de tensión, con acusacións de "obstrucionismo" por parte dalgúns colexiados e peticións de dimisión da xunta directiva.
A Asociación Enfermeiras de Pontevedra, personada na causa contra o que foi presidente do Colexio durante máis de tres décadas, Carlos Fernández (que saíu de prisión provisional xunto á súa muller e a súa filla o pasado mes de xullo), celebrou que se convoque unha asemblea xeral, aínda que criticou que non se contemple, nos puntos da orde do día, ningunha referencia á situación actual da institución nin ao informe realizado pola administración concursal, no que se pon de manifesto o incumprimento xeneralizado dos estatutos por parte das directivas do Colexio presididas por Fernández e as irregularidades contables.
Segundo esta asociación, a xunta directiva do Colexio (a excepción do secretario e o responsable de comunicación, que denunciaron ante a Xustiza as irregularidades) non permitiu que o informe do administrador concursal fose posto a disposición dos colexiados, tratan de "desviar a atención" deses feitos, e de aparentar "normalidade", á espera de que cese a intervención xudicial.
Ademais, incidiron, a pesar da detención do presidente, da investigación xudicial en curso e de que a propia tesoureira da xunta está a ser tamén investigada, os membros da directiva, que saíron das eleccións de 2018, non dimitiron. E todo iso, tras unha sentenza xudicial que obriga a repetir eses comicios por irregularidades e que foi recorrida por dita xunta directiva.
Finalmente, tamén denunciaron que a asemblea convocada para este xoves "está a ser manipulada" polos membros da xunta, ao esixir aos asemblearios as súas preguntas, "cando aínda descoñecen o contido dos puntos" e "tratan de minimizar a asistencia, para pasar 'no bico dos pés' por este trámite".
CHAMAMENTO Á PARTICIPACIÓN
Pola súa banda, secretario do Colexio (unha das persoas que denunciou as irregularidades no organismo), Faustino Portela, instou aos colexiados a que acudan á asemblea de forma "masiva" para "promover o cesamento" da actual xunta directiva e esixir a convocatoria de eleccións de inmediato.
Portela permanece no seu cargo de secretario, segundo sinalou, á espera de que a actual directiva decida ou se lle force a irse, aínda que afirmou que non se lle permite realizar as súas funcións.
"Eticamente, o seu sería dimitir en bloque o mesmo día das detencións do presidente e a súa familia (en marzo deste ano), pero lonxe diso, tentan soster a mesma estrutura á espera de que o xuíz libere das súas funcións aos administradores", denunciou.
