Aumenta un 5% no terceiro trimestre o custo laboral en Galicia
Por hora efectiva, o custo laboral na comunidade galega alcanza os 19,49 euros por traballador.
Por E.P. | SANTIAGO DE COMPOSTELA | 17/12/2021 | Actualizada ás 11:30
O custo laboral medio por traballador e mes (que inclúe as remuneracións e as cotizacións sociais) incrementouse un 5% no terceiro trimestre do ano en Galicia en relación ao mesmo período de 2020, de forma que se sitúa en 2.422,27 euros, segundo os datos que publica este venres o Instituto Nacional de Estatística (INE).
Esta repunta é unha décima superior á media española, que crece un 4,9%. Con todo, o dato galego é 226,6 euros inferior ao do conxunto de comunidades, que se eleva ata 2.648,87 euros.
Por hora efectiva, o custo laboral na comunidade galega alcanzou os 19,49 euros por traballador, un 0,9% máis que o mesmo trimestre do ano anterior. Este avance contrasta co recorte do 0,3% en España, onde son 21,89 euros.
Mentres, o custo salarial galego, de 1.764,99 euros ata setembro, subiu un 4,2% en taxa anual, aínda que é menos que a media española (+5%), que se eleva ata 1.952,37 euros. O custo salario por hora sitúase en 14,2 euros, un 0,1% máis, e en España é de 16,13 euros (-0,2%).
Mentres, a xornada laboral galega queda en 154,2 horas pactadas por traballador e mes, son 124,3 as efectivas e 30,4 as non traballadas. A tempo completo a distribución é: 169,6 pactadas, 135,4 efectivas e 34,7 sen traballar.
Por último, Galicia presenta 5.077 vacantes, un 4,3% do total. Nun 93,7% dos casos é porque non se necesita ningún traballador máis, nun 3,2% debido ao elevado custo de contratación e nun 3,1% responde a outras causas.
