Pardo de Vera afirma que a bonificación da AP-53 está en estudo e lamenta que á Xunta "nunca lle chega nada"
Reproba que cando o PP gobernou o Estado, a Xunta "nunca promoveu nada".
Por Europa Press / Redacción | VIGO | 17/12/2021 | Actualizada ás 14:22
A secretaria de Estado de Transporte, Isabel Pardo de Vera, asegurou este venres que o Goberno está a facer un estudo encamiñado a eliminar as "brechas territoriais" no que respecta ás bonificacións en autoestradas de peaxe e que, entre os viarios en estudo, está tamén a AP-53 (Santiago-Dozón), á vez que respondeu ás esixencias da Xunta censurando que "sempre fala do que non lle compete" e "nunca lle chega nada".
Así o manifestou, en resposta a preguntas dos xornalistas tras manter unha reunión co alcalde de Vigo, Abel Caballero, e lembrou que, cando o PP estivo no Goberno central, a Xunta "nunca promoveu nada" con respecto a subvencións nas peaxes desa autoestrada.
Pardo de Vera sinalou que o Goberno está "a analizar toda a rede de estradas do Estado" e vai presentar un plan "que elimine as brechas territoriais, en canto ao desequilibrio respecto de bonificacións e peaxes excesivas". Trátase, recalcou, de "homoxeneizar" toda a rede de viarias e que non haxa "brechas de competitividade entre os cidadáns" por motivos de territorio. Con respecto á AP-9, explicou, o Goberno aplicou as rebaixas porque había "un desequilibrio tremendo con respecto ao resto do país" e fíxose "o posible" cos 1.700 millóns de euros dispoñibles.
En todo caso, reiterou que o Executivo está a estudar "con acougo" o resto de estradas para lograr un "equilibrio" entre a conservación, a posta a punto e dixitalización, e a integración nunha rede sustentable que reclama a UE, estudando puntos de recarga, aparcadoiros seguros, etc. "para redimensionar o sistema garantista de altas prestacións e de vías convencionais".
