Por E.P. | SANTIAGO DE COMPOSTELA | 08/01/2022 | Actualizada ás 11:02
A Garda Civil sumou un total de 28 persoas detidas ou investigadas en relación con incendios forestais ocorridos en Galicia ao longo do ano 2021. Son datos que expón nun comunicado a Delegación do Goberno, que subliña que o período con maior actividade foi de maio a setembro, durante o cal a Benemérita apresou a 19 presuntos responsables destes lumes, case o 70 por cento de todo o exercicio.
Por meses, destaca o de maio, con sete detidos ou investigados --cinco na provincia de Ourense, un na Coruña e outro en Lugo--, tras o cal están marzo, abril, xuño, xullo, agosto e setembro, coa mesma cifra de tres detencións. Se se observa o dato por provincias, a de Ourense acumulou 13 apresados ou investigados, o que supón o 46 por cento do total de Galicia. Séguenlle, por orde, Lugo con sete, A Coruña con cinco e Pontevedra con tres.
O delegado do Goberno en Galicia, José Miñones, agradece "o intenso traballo e entrega" dos gardas civís na loita contra os incendios forestais e nas investigacións das súas causas. Ademais, recalca que o Executivo estatal seguirá prestando "a máxima colaboración" en previr e combater as chamas para minimizar a afectación ao territorio e garantir a seguridade da poboación galega.
Neste contexto, o delegado do Goberno insiste en que a colaboración cidadá é moitas veces "chave" para identificar aos presuntos autores e lembra a importancia de avisar aos corpos e forzas de seguridade do Estado sobre calquera imprudencia ou conduta incendiaria para facilitar as investigacións e as detencións dos responsables.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.