Seis lumes rexistrados nas últimas horas en Ourense calcinan xa 200 hectáreas en pleno inverno
Os dous lumes que continúan activos no Parque Natural do Xurés calcinan unhas 90 hectáreas.
Por Europa Press / Redacción | OURENSE | 30/01/2022 | Actualizada ás 19:31
O Parque Natural da Baixa Limia-Serra do Xurés rexistra na tarde deste domingo dous incendios forestais activos nos municipios de Entrimo e Calvos de Randín. Ambos entraron desde Portugal e a superficie arrasada ascende a 98 hectáreas, de acordo coas estimacións recollidas no parte de incendios ofrecido pola Consellería do Medio Rural ás 18,00 horas.
O foco máis grande é o rexistrado en Entrimo, concretamente na parroquia de Venceáns, que afecta a 50 hectáreas. Para o seu control, mobilizáronse tres axentes, tres brigadas, unha motobomba e dous avións.
En Calvos de Randín, outro lume activo na parroquia de Randín leva queimadas sobre 40 hectáreas do Parque do Xurés. Nel, traballaron dous axentes, unha brigada, unha motobomba e un helicóptero.
Mentres tanto, o terceiro dos incendios que afectou ao devandito parque nas últimas horas, rexistrado de madrugada en Muíños, concretamente na parroquia de Prado de Limia, quedou extinguido desde as 16,06 horas da tarde deste domingo.
Segundo a Consellería do Medio Rural, tamén entrou desde Portugal e calcinou unha superficie de oito hectáreas de monte raso.
OUTRO TRES INCENDIOS
Á parte dos que afectan o Parque do Xurés, permanece activo un lume no municipio ourensán de Baltar que supera as 20 hectáreas queimadas na parroquia de Abades. Para o seu control, mobilizáronse tres axentes, tres brigadas e dúas motobombas.
Ademais, está xa estabilizado desde as 17,45 outro incendio forestal no mesmo municipio, pero na parroquia de Vilamaior da Boullosa. Neste caso, afecta a unhas 40 hectáreas e implicou a mobilización de tres axentes, catro brigadas, unha motobomba e un helicóptero.
Finalmente, pouco antes das 18,00 da tarde quedou extinguido outro lume da Gudiña, na parroquia de O Tameirón, que se iniciaba en dous focos pola mañá e que calcinou unhas 60 hectáreas --45 de monte raso e 15 de arboledo--. Neste foco, traballaron un axente, catro brigadas, unha motobomba, un helicóptero e un avión.
