Por Europa Press / Redacción | SANTIAGO DE COMPOSTELA | 28/02/2022 | Actualizada ás 15:36
O alcalde de Santiago, Xosé Sánchez Bugallo, anunciou que o Concello vai colaborar con Cruz Vermella e unha empresa de Vilagarcía para enviar medicamentos a Ucraína. Igualmente, o rexedor indicou que se calquera cidadán ucraíno residente en Compostela quere porse en contacto co Concello, estarán "encantados de atendelos".
Na rolda de prensa, o rexedor lembrou que todos os partidos políticos de Santiago adoptaron unha declaración conxunta de solidariedade e de condena á invasión de Ucraína por parte de Rusia.
Dentro das medidas de solidariedade, o alcalde remarcou que realizaron o "xesto simbólico" de iluminar a fachada do Concello coas cores da bandeira ucraína polas noites, e que están pendentes de ver que máis poden facer para "facer chegar" a "solidariedade aos cidadáns ucraínos".
"Imos ter que pagar todas as consecuencias deste conflito", sostén, polo que avisa de que ninguén debe cometer o erro de pensar que: "Ucraína está moi lonxe e non ten nada que ver connosco". "Hai un antes e un despois desde o 24 de febreiro", sentenciou, pois "o futuro de Europa cambiou ese día".
"UNHA DESGRAZA"
"Isto é unha desgraza mírese por onde se mire", lamentou Bugallo. Advirte de que haberá que elixir entre cal é a "desgraza maior e a desgraza menos maior". Ademais, explicou que "se a guerra continua", será "durísimo".
O alcalde de Santiago expresou que o único camiño para terminar co conflito no curto prazo é "darlle a Putin o que quere" porque "non se vai a conformar se non toma o control de Ucraína, dunha ou outra maneira".
Con todo, Bugallo definiu ese escenario como "moi complicado" porque "os rusos son un país moi admirable en moitos sentidos e un deles é que ten unha enorme capacidade de sacrificio".
OFRECEMENTO DE SAN XOÁN DE RÍO
Pola súa banda, o alcalde de San Xoán de Río, Xosé Miguel Pérez Blecua, enviou á Embaixada de Ucraína en España o ofrecemento de instalacións municipais para a acollida de 50 nenos ucraínos.
En escrito, o rexedor sinala que nestas instalacións, dunha extensión de sete hectáreas, disponse de edificios como o que estivo funcionando recentemente como albergue xuvenil. Tamén un restaurante e un pequeno colexio.
Sostén que pode ser un lugar adecuado para "crear un pequeno pobo temporal ucraíno", de forma que "nenos e os seus coidadores poidan vivir exactamente igual" e seguir coas súas rutinas.
"Este é o noso humilde gran de area que podemos achegar ao pobo ucraíno para reducir os efectos dunha invasión rusa sen xustificación", asegura o alcalde no escrito.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.