Traballadores das contratas da refinaría da Coruña convocan unha manifestación este venres

Traballadores das contratas da refinaría de Repsol na Coruña acordaron convocar unha manifestación este venres para esixir que se esclarezan as causas do accidente no que resultaron feridos dous operarios, co resultado dun deles falecido. Tamén reclaman melloras inmediatas nas medidas de seguridade e condicións de traballo dignas.

Así o informou a CIG sobre os acordos adoptados en asemblea. Segundo precisou Esteban García, representante sindical da subcontrata de Nervión á que pertencían os operarios do accidente rexistrado o sábado, acordaron pedir formalmente a folga. "Está pedida, pero esperemos que antes estea arranxado isto", dixo, aínda que os traballadores xa manteñen desde o sinistro un paro.

En canto á manifestación, sairá ás 11,30 horas desde a porta da refinaría de Bens, onde permanecen concentrados traballadores das auxiliares e discorrerá pola avenida de Finisterre ata a praza de Pontevedra, para, desde aí, dirixirse á Delegación do Goberno en Galicia.

A mobilización foi aprobada na asemblea celebrada este mediodía na que tamén se informou das xestións realizadas pola coordinadora das contratas par lograr que Repsol atenda as demandas contidas na táboa reivindicativa.

Neste sentido, o secretario xeral da CIG, Paulo Carril, informou que iniciaron contactos coa Xunta de Galicia para que se implique neste conflito. Tamén criticou que a empresa non mantivese un novo contacto cos parte social desde a reunión deste mércores.

Traballadores das empresas auxiliares da refinaría de Repsol na Coruña están concentrados desde o sete desa mañá nas distintas portas das instalacións. CIG