Detido en Hungría o 'Escobar brasileiro' que finxira a súa morte para non ser condenado na Audiencia de Pontevedra

Sérgio Roberto de Carvalho, narcotraficante buscado pola Interpol e coñecido como 'Major Carvalho' ou o 'Escobar brasileiro', foi detido este martes en Budapest (Hungría), segundo publican medios portugueses e brasileiros.

En España, operaba baixo a falsa identidade de 'Paul Wouter' e era un dos detidos polo alixo de 1.700 quilos de cocaína intervidos no remolcador 'Titán III' en agosto 2018. Con todo, para evitar ser procesado pola Audiencia de Pontevedra, Carvalho finxiu a súa morte por covid --recoñecida por un xulgado en base a un certificado médico falso-- en agosto do 2020 en Marbella, cidade na que fora apresado.

De acordo con medios brasileiros, o 'Maior Carvalho' finalmente foi detido pola Europol en Budapest, onde utilizaba documentación mexicana. Desde novembro de 2020, era buscado pola Policía lusa despois de que conseguise fuxir dun operativo conxunto entre Portugal e Brasil.

Desde entón, crese que viaxaba por Europa do leste con distintas identidades e que mesmo chegou ata Dubai (Emiratos Árabes Unidos), onde radica unha das súas empresas de comercio exterior. As investigacións da Policía Federal de Brasil atribúen ao 'Maior Carvalho' unha estrutura complexa de sociedades para operar os seus negocios ilícitos. Dirixía unha armazón que supostamente enviaba a droga desde portos do seu país de orixe a Europa.

Carvalho é un expolicía militar que está considerado como o maior narcotraficante independente de Brasil, así como un dos homes máis buscados do mundo, tal e como recollen medios locais.

Audiencia Provincial de Pontevedra.