Desconvocada a folga do metal na provincia da Coruña tras un acordo sobre o convenio

A folga do sector do metal na provincia da Coruña con xornadas de paros previstos esta semana quedou desconvocada tras aceptar patronal e sindicatos a proposta de convenio coa mediación do AGA (Acordo Interprofesional Galego de Solucións Extraxudiciais de Traballo). Así o informou, en rolda de prensa, o secretario nacional de CIG-Industria, Xoán Xosé Bouzas, despois das asembleas de traballadores convocados por este sindicato, que ten o 42% de representación neste sector.

Nestas asembleas, aceptaron por unanimidade a proposta de mediación para desbloquear o convenio colectivo, que esta central avanzou que asinará ao entender que se conseguiron os obxectivos fixados na negociación e que levaron tamén a varias xornadas de protestas. Xunto á CIG, segundo fontes sindicais, as outras centrais, UGT e CCOO, ademais da patronal, tamén aceptaron a proposta de convenio.

Da mesma, Bouzas destacou que se mantén "o poder adquisitivo para todo o sector durante toda a vixencia do convenio --entre 2020 e 2025--", ademais de "reducir a eventualidade" ou garantirse a subrogación "tanto para o sector público como privado", citou. A iso, sumou, entre outras cuestións, un día menos de xornada laboral e un día máis de vacacións.

"Todo isto conseguiuse despois de moitos meses de negociación, de manifestacións e concentracións", resaltou o dirixente da CIG, que destacou a unanimidade das centrais sindicais sobre a convocatoria dun total de sete xornadas de folga.

No entanto, admitiu que non conseguiron "todos os obxectivos marcados, pero si son positivos", dixo sobre os logrados nesta negociación. Así, destacou que os traballadores poderán "cobrar os atrasos de 2021, máis o incremento salarial". Respecto diso, sinalou que "a suma do incremento salarial para este convenio é do 15%", aínda que apostilou que ao estar supeditado ao IPC real podería ser "maior".

Unha vez aceptada a proposta nas asembleas de persoal, remitíuselle o resultado ao AGA, polo que agora queda pendente de concretar data de reunión da mesa de negociación para elaborar o texto definitivo do convenio e proceder a súa firma.

Manifestación pola folga do metal na provincia da Coruña. M. Dylan - Europa Press | Fonte: Europa Press