Por Europa Press / Redacción | SANTIAGO DE COMPOSTELA | 01/07/2022 | Actualizada ás 12:49
A Consellería de Cultura, Educación, Formación Profesional e Universidades publicou, no Diario Oficial de Galicia (DOG), a resolución da Dirección Xeral de Patrimonio Cultural pola que se incoa o procedemento para declarar Ben de Interese Cultural a cheminea da central termoeléctrica das Pontes.
Respecto diso, indica que constitúe "un elemento esencial, relevante e representativo do patrimonio industrial de Galicia, tanto pola súa contribución ao sistema eléctrico de Galicia e do Estado, en que producía o 5% do total, así como para as persoas das Pontes e toda a comarca, cunha fonda pegada nas súas formas de vida".
"A cheminea de formigón, de 36,40 metros de diámetro exterior na base e 356 metros de altura, é o elemento máis destacable, único e singular do conxunto, tanto en termos cuantitativos como no relativo á caracterización da paisaxe e representatividade do total das instalacións e a súa actividade".
Esta construción foi, ademais, no seu momento, a máis alta de Europa, "da mesma maneira que simboliza todo un conxunto excepcional na súa capacidade de produción eléctrica como na súa relación coa mina de lignitos e a súa historia de máis de cen anos desde que se comezaron a estudar as posibilidades do seu aproveitamento", engade a Xunta.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.