Unha campaña da RAG chega este venres a Laza para completar a súa toponimia tradicional
Por E.P. | OURENSE | 07/07/2022 | Actualizada ás 11:10
'Toponomízate. Falámosche dos nomes da túa terra', unha campaña que busca recuperar a toponimia tradicional de Galicia coordinada pola Real Academia Galega (RAG) e a Xunta, chegará este venres ao municipio ourensán de Laza.
Segundo destaca a academia, este concello "exemplifica como poucos a necesidade e urxencia de completar a recollida" da microtoponimia, un labor para a cal se solicitará á cidadanía que achegue nomes de montes, campos, fontes, camiños e doutros lugares que corren o risco de perderse.
Será a través dunha charla celebrada no Concello de Laza a partir das 20,00 horas presentada polo alcalde, José Ramón Barreal, e impartida polo coordinador técnico do Seminario de Onomástica da RAG, Vicente Feijóo.
