Día Europeo das Linguas: a infancia, o mellor momento para coñecer idiomas

Alimentar o cerebro humano con idiomas, e facelo desde idades temperás, é unha forma de desenvolvelo e de reforzar o seu potencial. Ademais, os idiomas proporcionan o don da universalidade, a posibilidade de abrir a mente a outras culturas, de vivir outras vidas, de acceder a novas oportunidades profesionais.

Hoxe, a maioría das crianzas están a aprender polo menos unha lingua diferente á súa materna case desde que nacen. "Canto antes introduzamos un bebé nunha segunda lingua, moito mellor, mesmo antes de cumprir o seu primeiro ano, pois eles teñen unha gran capacidade para distinguir os diferentes sons das vocais e consonantes que hai nun determinado idioma. Hai que expoñelos e mergullalos ao máximo, canto antes, para que poidan absorber o idioma unha vez se atopen na fase de adquisición temperá del", sostén Rhona Anne Dick, directora de Experiencia de Aprendizaxe de Lingokids.   

A gran vantaxe nestas idades, segundo a experta, é que o proceso de aprendizaxe é totalmente natural, case pasivo e inconsciente. "Un neno pode crecer aprendendo varios idiomas nos seus cinco primeiros anos de vida. En circunstancias nas que cada proxenitor ten unha lingua materna diferente e viven nun lugar cunha terceira lingua dominante, o pequeno poderá aprender as tres de forma simultánea co mesmo proceso natural. A exposición, a frecuencia e a necesidade de usalas determinará a súa evolución e como acabe falando cada unha delas", asegura Rhona Anne Dick.

APRENDER NA IDADE ADULTA

Mais, é a idade un impedimento para aprender unha nova lingua? "Se xa aprendiches un idioma es capaz de establecer máis conexións entre as linguas, as regras gramaticais e os sons. Xa coñeces o proceso e as dificultades, e velo máis como un reto no que te centras no tipo de aprendizaxe que se axusta mellor ás túas necesidades, o que che permite conseguir pequenas vitorias en menos tempo e o que te motiva para seguir avanzando", apunta Sylvia Johnson, responsable de Metodoloxía da plataforma Preply.

Esta experta destaca que os adultos teñen a capacidade de xestionar mellor o tempo e de concentrar mellor os obxectivos. "Aínda que poida que a memoria non sexa tan aguda, somos máis conscientes da necesidade de practicar e adestrar o noso cerebro para conectar e producir a lingua cando sexa necesario. Si é certo que a idade é un hándicap para a pronuncia. O cerebro dun bebé está preparado para adquirir calquera tipo de son, pero conforme se fai maior limítase aos da súa lingua materna, e esa é a razón pola cal os sons doutras linguas nos resultan máis difíciles de interiorizar sendo adultos, asegura Sylvia Johnson.