Os ingresos con covid rozan os 200 e o Sergas notifica outros dous óbitos
Os casos activos mantéñense en descenso.
Por Europa Press / Redacción | SANTIAGO DE COMPOSTELA | 25/10/2022 | Actualizada ás 11:57
A cifra de pacientes con covid-19 hospitalizados en Galicia mantense, tras a alza dos últimos días, ao redor dos 200 --199, un máis que no anterior parte da Consellería de Sanidade--. Segue en descenso no que respecta aos casos activos (2.271, 67 menos que na última notificación) e o Sergas informou doutros dous óbitos de pacientes contaxiados, o que eleva as vítimas a 3.932.
De acordo cos datos publicados este martes pola Consellería de Sanidade, actualizados ás 18,00 horas da pasada xornada, o cómputo de ingresados con covid-19 mantense con escasas variacións e segue rozando os 200. Hai 192 pacientes en planta (dúas máis dos notificados este luns) e sete en unidades de coidados intensivos (UCI).
Por áreas sanitarias, A Coruña computa un total de 70 hospitalizados, dous menos que onte, dos que 68 están en planta e dúas (sen variación con respecto á xornada anterior) en UCI. Con máis ingresados séguelle Ourense, que pasa de 31 a 32, dos que dous seguen en coidados intensivos; e Pontevedra-O Salnés, que baixa de 31 a 29 e non ten ningún paciente en unidades de críticos.
Na área compostelá e do Barbanza prodúcese un incremento de 15 ata 20 hospitalizados (cinco máis que no parte anterior), aínda que segue sen pacientes con covid na UCI; mentres que en Lugo-A Mariña-Monforte hai 18 hospitalizados (dous menos), ningún deles en críticos.
A área viguesa ten 14 hospitalizados (un menos que no parte oficial previo), pero ten o maior número de pacientes con covid en UCI das sete (un total de 3); mentres que na área sanitaria ferrolá, o número de ingresados sitúase en 13 (-1) e ten as súas unidades de coidados intensivos libres de coronavirus.
CASOS ACTIVOS
En canto aos casos activos --é dicir, persoas que están a atravesar a enfermidade-- continúan en descenso en relación á pasada xornada, ata os 2.271, un total de 67 menos que no parte trasladado este luns. Todas as áreas sanitarias reflicten o descenso excepto Lugo, cun incremento de tres (ata 280). Mentres, a da Coruña mantense como a que rexistra o maior número de casos activos, con 496, 23 menos que no parte sanitario anterior.
Pero tamén caeron os casos activos na de Ourense, ata os 381 (-16); na de Vigo, a 330 (-10); na de Santiago, a 318 (-12); e na de Ferrol, a 182 (-12). Hai, ademais, tres sen área asignada. En canto aos casos novos abertos nas últimas horas, activáronse un total de 174, a maioría nas áreas ourensá (32) e compostelá (31). Na área lucense, notifícanse 29; 25 na viguesa, 23 na de Pontevedra e O Salnés e 10 na ferrolá. Hai un novo caso sen área asignada.
DOUS FALECIDOS
O Sergas tamén informou de que hai 2.072 persoas que están a pasar no seu domicilio a enfermidade. E en total, desde que se empezou a pandemia, realizáronse case 4 millóns de PCR e o número total de persoas contaxiadas é de 682.030.
O número de falecidos con covid é de 3.932 en Galicia, xa que, tras non notificar óbitos nos últimos días, Sanidade informa de que perderon a vida dúas persoas: un home de 85 anos na área sanitaria ourensá, e unha muller de 91, na viguesa. Ambos tiñan patoloxías previas. O número de doses de vacina contra a covid-19 administradas é de 7.131.665.
