O paro baixa en 4.600 persoas en Galicia nos meses de verán, mentres sobe a nivel estatal
Entre xullo e setembro a ocupación incrementouse en 8.500 postos de traballo.
Por Europa Press / Redacción | SANTIAGO DE COMPOSTELA | 27/10/2022 | Actualizada ás 10:29
O parou baixou en Galicia en 4.600 persoas entre xullo e setembro, o que supón un 3,3% menos que no trimestre anterior, mentres que a ocupación se incrementou en 8.500 postos de traballo (+0,77%), situándose nun total de 1,11 millóns de persoas, segundo a Enquisa de Poboación Activa publicada este xoves polo Instituto Nacional de Estatística (INE).
Estas cifras, recollidas por Europa Press, contrastan cos datos do total de España, onde o paro subiu en 60.800 persoas o trimestre pasado, un 2,1% máis, ata máis de 2,98 millóns de desempregados. En concreto, a finais de setembro, o número total de persoas paradas en Galicia ascendía ás 134.800 persoas, 8.100 persoas máis que hai un ano, un 6,42% máis.
Así, a taxa de paro situouse no 10,8%, por baixo do 12,67% do total estatal, mentres que a taxa de actividade en Galicia foi do 53,29%, tamén por baixo do 58,86% estatal. Das 134.800 persoas paradas galegas, case un 47% é home, mentres que algo máis dun 53%, é muller.
DATOS ESTATAIS
A nivel estatal, o paro subiu en 60.800 persoas entre xullo e setembro, 2,1% máis, mentres que a ocupación se incrementou en 77.700 postos de traballo (+0,4%), ata os 20,5 millóns de persoas, sempre segundo datos do INE. En concreto, ao finalizar setembro, o número total de parados situouse en 2.980.200 persoas e o de ocupados, en 20.545.700 persoas, a súa maior cifra desde o terceiro trimestre de 2008, cando se superaron os 20,55 millóns de traballadores.
Exceptuando 2020, cando a pandemia disparou o paro no terceiro trimestre en 355.000 persoas, a repunta do desemprego rexistrado este verán é o peor dato nun terceiro trimestre desde 2012, cando creceu en 93.200 persoas. No verán de 2021 rexistrouse un descenso do desemprego de 127.100 persoas.
Desta forma, a taxa de paro repuntou case dúas décimas no terceiro trimestre deste ano, ata o 12,67%, mentres que a taxa de actividade subiu algo máis dunha décima, ata o 58,86%, tras aumentar o número de activos en 138.500 persoas entre xullo e setembro (+0,6%).
No que respecta á creación de emprego, os 77.700 postos de traballo xerados no terceiro trimestre contrastan coas fortes repuntas que se rexistraron no mesmo período de 2020 (+569.600 empregos) e 2021 (+359.300), nos que o fin das restricións impulsou a creación de emprego. En comparación co terceiro trimestre de 2019, antes da pandemia, a cifra de novos ocupados rexistrada este ano é algo superior.
