Por E.P. | SANTIAGO DE COMPOSTELA | 15/11/2022 | Actualizada ás 13:52
A Avogacía do Estado, que representa a Adif no xuízo polo accidente do tren Alvia, renunciou a dous das testemuñas que propuxera para a xornada deste martes, de modo que o proceso retómase este mércores.
Na que foi a décima xornada do xuízo, das máis breves polo momento, compareceu en calidade de testemuña un inspector de seguridade que realizou viaxes de acompañamento na liña Ourense-Santiago, na que descarrilou o tren, ocasionando 80 mortes e deixando a máis de 145 persoas feridas.
Estaba inicialmente convocado outro inspector de seguridade de Adif, pero a avogada do estado renunciou a el e o seu compañeiro mencionou na súa intervención que se atopa a tratamento médico. Mentres, quen era o seu xefe por entón xa faleceu. E é que o sinistro ocorreu fai xa máis de nove anos, en xullo de 2013.
Tamén renunciou a letrada que representa a Adif ao testemuño dun axente da Policía Nacional. Así as cousas, está previsto que o xuízo arrinque de novo este mércores ás 9,30 horas, coas declaracións de María Rosa Sanz Cerdeira, no seu momento secretaria do consello de administración de Adif, e José Luís Rodríguez Villarino e Anxo Lluch Perales, ambos os cargos de Renfe que recibiron o correo co aviso dun xefe de maquinistas sobre o perigo da curva.
Mentres, Sanz Cerdeira certificou que as competencias sobre medidas de seguridade achábanse delegadas no director de Seguridade na Circulación de Adif. En concreto, recaía sobre este director a competencia para aprobar circulares e instrucións, segundo o seu certificado.
O xoves 17 seguirá abordándose o correo electrónico enviado polo xefe de maquinistas José Ramón Igrexas Mazaira, xa que declararán o que era xerente de Produción de Viaxeiros de Renfe Rafael Sardón Tejedor, que tamén o recibiu, e Nicolás Esquerdo Nadal, xefe de Produción de Viaxeiros. Por último, está convocado o formador de maquinistas Manuel González Sánchez, ao que tamén chegou o correo co que Igrexas Mazaira alertaba dunha sinalización deficiente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.