"Salvar e fortalecer a Atención Primaria", obxectivo das mobilizacións do 30 de novembro en toda Galicia

A plataforma SOS Sanidade Pública chamou á cidadanía a participar nas mobilizacións convocadas o 30 de novembro en varias localidades galegas para "salvar e fortalecer a Atención Primaria e todo o sistema sanitario público galego", que "está ameazado polas políticas de recortes e desmantelamento da Xunta".

Segundo sinalou a plataforma nun comunicado, o obxectivo desta convocatoria, que levará a cabo en diversas localidades, é "pór en valor a Iniciativa Lexislativa Popular" que SOS Sanidade Pública puxo en marcha no mes de xuño e que "demostra que outra Atención Primaria é posible".

Deste xeito, a plataforma sinalou que a poboación "sofre importantes trabas e limitacións para acceder e ser atendida" nos centros de saúde, puntos de atención continuada (PAC) e servizos de Pediatría de Atención Primaria. Así, denunciou as listas de espera "de días ou semanas", o peche de PAC e centros de saúde rurais ou o abandono da participación comunitaria.

Nesa liña, insistiu que o persoal dos centros de saúde e PAC está "sometido a condicións de inestabilidade e precariedade laboral", así como a unha "enorme presión asistencial por falta de recursos".

Varias persoas con pancartas en defensa da sanidade pública galega, durante unha manifestación convocada para demandar 'máis recursos' para Atención Primaria | Fonte: C. César Arxina