O plan enogastronómico porá en valor o viño e o polbo en Valdeorras e O Carballiño, entre outros concellos

A directora de Turismo de Galicia, Nava Castro, e o delegado territorial da Xunta en Ourense, Gabriel Alén, participaron este martes na presentación dos Plans de Sustentabilidade Turística de Enogastronomía na provincia, do que se beneficiarán 30 concellos.

Segundo trasladou a Xunta nun comunicado, estes concellos contarán con 4 millóns de euros para levar a cabo tres dos plans aprobados na Conferencia Sectorial de Turismo, a proposta do Goberno galego.

Castro puxo en valor durante a súa intervención os tres Plans de Sustentabilidade Turística en Destino (PSTD). Un deles é o PSTD Valdeorras con 1,5 millóns de euros para a posta en valor da súa Ruta do viño e as súas covas centenarias.

Así mesmo, están o PSTD Ribeiro, que conta cunha partida de 1,5 millóns de euros e que tamén porá en valor a Ruta do viño do Ribeiro, e o PSTD O Carballiño e a gastronomía do polbo, con 1 millón de euros.

Estas intervencións forman parte do Plan Territorial de Galicia, que está composto por tres Actuacións de Cohesión en Destino (ACD), cun investimento de 14,9 millóns de euros, e 11 PSTD, impulsados por entidades locais, que recibirán un total de 17 millóns de euros.

Unha das catas realizadas na XXIII Feira do Viño de Valdeorras | Fonte: CRDO Valdeorras