O alcalde de Pontevedra espera que o Supremo ratifique "que a prórroga de ENCE é ilegal"

O alcalde de Pontevedra, Miguel Anxo Fernández Lores, dixo este xoves que espera que o Tribunal Supremo ratifique o próximo mes de febreiro as sentenzas da Audiencia Nacional que declaran a nulidade da prórroga da concesión de dominio público marítimo terrestre na que se asenta a fábrica de Ence en Lourizán.

Preguntado pola resolución destes recursos ao TS, Lores confía en que o alto tribunal "veña a confirmar a sentenza da Audiencia Nacional, que foi moi clara". "Foron cinco relatores de seis que dixeron que a prórroga foi ilegal", dixo o rexedor que, de non ser favorable, avanzou que seguirá "traballando para que se vaia" da ría de Pontevedra.

No mesmo sentido pronunciouse a portavoz nacional do BNG, Ana Pontón, que participaba co alcalde nunha rolda de prensa cando se abordou este asunto. A líder nacionalista dixo que "sería sorprendente" que non se ratificasen as sentenzas da Audiencia Nacional que declaran a nulidade da prórroga de Ence. "Non hai ningún motivo xurídico que avale un cambio de criterio", apuntou.

Así mesmo, Ana Pontón tamén destacou a importancia de "que as autoridades lle busquen outra localización" mentres tanto, algo "no que debería de estar a traballar a Xunta do Partido Popular".

O alcalde pontevedrés insistiu en que a fábrica, "desde o punto de vista legal, ten que marchar de aí" e engadiu que "desde a loita contra a contaminación, tamén", polo que reitera que desde o goberno municipal defenderán "todas as vías para que o traslado se produza canto antes".

Fernández Lores indicou que o consistorio está "a traballar para mellorar a calidade de vida da cidade", algo que ve "unha absoluta incongruencia" co feito de "manter unha celulosa no espazo urbano".

Por último, Lores apuntou que "gran parte das cidades deslocalizaron as empresas que eran contaminantes", polo que argumenta que "Pontevedra ten todo o dereito do mundo tamén a deslocalizar unha empresa que provoca contaminación no ámbito da cidade". "Non hai futuro nin progreso sen respecto polo medio ambiente", concluíu.