Dan de alta ao menor de 17 anos acoitelado o pasado domingo en Santiago, tras extirparlle o bazo
O pasado martes decretábase o ingreso en prisión do detido de 23 anos.
Por Europa Press / Redacción | SANTIAGO DE COMPOSTELA | 12/01/2023 | Actualizada ás 16:12
O mozo de 17 anos apuñalado durante unha liorta ocorrida á primeira hora do pasado día 8 na zona do Ensanche en Santiago de Compostela recibiu a alta médica.
Así o confirmaron a Europa Press fontes do Hospital Clínico de Santiago, onde o mozo permanecía ingresado desde o ataque. Como resultado das feridas sufridas, o mozo tivo que ser intervido e tiveron que extirparlle o bazo.
Grazas ao relato de testemuñas presenciais da liorta, que tivo lugar pasadas as 05.00 horas fronte á discoteca Vanitas, na Rúa Nova de Abaixo, e á descrición que estes ofreceron á Policía, os axentes identificaron ao presunto autor ese mesmo día.
O xulgado de Instrución número 2, en funcións de garda, decretou este martes o ingreso en prisión do detido, de 23 anos. Está acusado de tentativa de homicidio/asasinato.
