Os galegos non queren seguros sanitarios privados "a pesar do discurso da Xunta de que a poboación se pase á privada"
É unha das comunidades españolas con menor porcentaxe de seguros sanitarios privados, que ten subscrito o 16,6% da poboación, 8 puntos por baixo da media nacional
Por Europa Press / Redacción | SANTIAGO DE COMPOSTELA | 02/02/2023 | Actualizada ás 17:29
Galicia é unha das comunidades españolas con menor porcentaxe de seguros sanitarios privados, que ten subscrito o 16,6% da poboación, 8 puntos por baixo da media nacional, que é do 24,4%.
Así o explicou este xoves a xerente do Servizo Galego de Saúde, Estrela López-Pardo, que compareceu na Comisión de Sanidade para responder a unha pregunta do deputado socialista Xullo Torrado en relación á evolución da sanidade privada en Galicia.
Na súa intervención, Torrado acusou á sanidade privada de "aumentar o seu volume de negocio a costa" da sanidade pública e, especialmente, das súas "debilidades", entre elas a rapidez de acceso.
"O sistema privado non achega unha maior calidade", explicou Torrado que, no entanto, destacou que, nas diferentes enquisas, a poboación que preferiría esta opción sanitaria refire o "maior confort", así como a mellor accesibilidade, "máis axilidade, máis velocidade na atención" ou a axilización das listas de espera, entre outras cuestións.
Para o deputado socialista é "evidente" que é precisamente nas cuestións relativas á saturación e a espera nas que a sanidade pública "está a perder capacidade de atención" e vólvese "ineficiente" á hora de "ser accesible" ao cidadán.
Xullo Torrado considerou que, na situación actual, as políticas da sanidade pública "están a favorecer ao sistema privado" aproveitándose "das súas debilidades" e preguntou á representante do Sergas se senten "preocupados" por esta cuestión.
En datos, o socialista explicou que o barómetro sanitario de 2016 indicaba que o 13,1% dos galegos elixirían a privada sobre a pública se puidesen, unha cifra que en 2022 sitúase "practicamente no 21%". "Hai unha tendencia alcista", ha destado Torrado.
DATOS DE SEGUROS
Fronte a esta intervención, a xerente do Sergas apuntou que a "penetración do seguro privado" en Galicia no ámbito sanitario non está a experimentar "un crecemento". Así, en Galicia teno subscrito o 16,6% da poboación, segundo o informe da Unión Española de Entidades Aseguradoras, oito puntos menos que a media nacional.
Ademais, destacou, en 2008 Galicia era "a sexta comunicade con máis porcentaxe de seguros privados" entre a súa poboación, mentres que agora está no posto 13 de 17. Para Estrela Lopez-Pardo, este "descenso non encaixa moito" co "discurso de que a Xunta promove que a poboación se pase á sanidade privada". "Durante os anos deste Goberno, Galicia evitou a tendencia estatal de aumento do seguro privado", engadiu a xerente do Sergas.
Por outra banda, explicou que os datos do último barómetro sanitario do CIS apuntan que Galicia é a segunda comunidade na que máis porcentaxe de poboación elixiría a sanidade pública: un 76,5 por cento para unha consulta co médico de cabeceira, fronte ao 68,6% nacional; e un 84,2% para un ingreso hospitalario, fronte ao 75,2% estatal. "Os galegos confían plenamente no sistema sanitario público de Galicia", resolveu.
TRANSPORTE SANITARIO PONTEVEDRA
Na mesma comisión, Estrela López-Pardo respondeu tamén a unha pregunta formulada polo BNG sobre o contrato de transporte sanitario de Pontevedra, adxudicado a Ambulancias Civera e que está en vías de ser rescindido.
A pregunta foi formulada pola deputada Montse Prado, que chamou a atención sobre "a desatención" sanitaria que sofren "os veciños desta área" e, en particular, sobre os "incumprimentos" do servizo de transporte sanitario, que partía xa dunha posición "deficitaria" e que presenta "carencias" que están a afectar á poboación.
Na súa resposta, a xerente do Sergas apuntou que en setembro e decembro de 2022, a Xunta notificou á empresa dous procesos de penalidades que derivaron nunha multa de 109.000 euros e dun desconto de 132.000 euros adicionais nos obxectivos de calidade polos "incumprimentos non resoltos" en relación á concesión.
A xerencia de Pontevedra, explicou Estrela López-Pardo, "actuou desde un primeiro momento, seguindo os procesos establecidos para facer cumprir á empresa". No entanto, os expedientes "non conseguiron o efecto desexado", polo que en xaneiro iniciouse o procedemento para a rescisión do contrato, "a última das opcións".
Este proceso está en fase "inicial" de "notificación e trámite de audiencia". A súa resolución en firme implicaría para a empresa a perda da fianza de 600.000 euros. Paralelamente, está a tramitarse un novo expediente de concesión, que está "condicionado" a que a resolución do anterior contrato sexa firme.
Pola súa banda, o deputado nacionalista Luís Bará preguntou na mesma comisión, neste caso ao director xeral de Asistencia Sanitaria, Jorge Aboal, en relación á situación de asistencia do centro de saúde de Moraña (Pontevedra).
En concreto, Bará falou de "falta de médicos", anulación de citas e demoras para a asistencia, unha situación que "non é de agora", pero que se viu "agravada" pola pandemia. "Moraña non é unha excepción, por desgraza, é unha realidade habitual en toda a área sanitaria, que é a zona cero da degradación da sanidade pública en Galicia", engadiu o deputado, lembrando as mobilizacións convocadas na zona.
Na súa resposta, Aboal explicou que o centro conta con tres médicas, das que actualmente dous se atopan de baixa. A posibilidade de cubrir as ausencias, engadiu, vén condicionada porque "non hai profesionais para contratar", dixo Aboal, quen apuntou que, ante a ausencia de persoas na lista de substitución, optouse por cubrir estes ocos con prolongación de xornada.
En todo caso, dixo que "non pode falarse de falta de asistencia" neste centro, xa que os 3.300 cidadáns da cota foron atendidos máis de 19.000 veces o ano pasado, o que implica seis atencións por cada un dos pacientes da cota ao ano, algo que se sitúa "na media do Sergas". "O centro está dimensionado e a actividade e os cocientes están dentro da media do Sergas", engadiu.
REPROCHES Ao BNG
Tanto o director xeral de Asistencia Sanitaria como a xerente do Sergas aproveitaron as dúas preguntas realizadas polo grupo do BNG para pedir á portavoz de Sanidade, Montse Prado, que "rectifique" as declaracións realizadas no Parlamento nas que tachou aos responsables da sanidade pública galega de "cuadrilla de psicópatas".
En concreto, Aboal pediulle que "non frivolice coa enfermidade mental" e cualificou as súas palabras de "unha falta de respecto para as persoas enfermas". Pola súa banda, Estrela López-Pardo afeou a "nula sensibilidade" da deputada e esixiulle "unha desculpa", antes de renunciar á súa última quenda de palabra tras non recibila.
