A Barcelona Wine Week será a plataforma de presentación de 25 adegas galegas cos seus mellores licores
O sector vitivinícola galego, entre as cinco DO e o catro indicacións xeográficas protexidas, con máis de 10.000 profesionais e case 500 adegas, aglutina un valor económico de case 300 millóns anuais.
Por E.P. | SANTIAGO DE COMPOSTELA | 06/02/2023 | Actualizada ás 20:33
Unha delegación galega, que contará coa presenza de 25 adegas, presumirán dos licores, viños e augardentes de Galicia durante a Barcelona Wine Week, que se celebra desde este luns 6 de febreiro e ata o mércores 8.
Por parte da Xunta, á inauguración asistiu o director da Axencia Galega da Calidade Alimentaria (Agacal), José Luís Cabarcos. Este organismo contará cun espazo propio no que se poderán degustar os produtos premiados nas Catas de Galicia 2022, celebradas o pasado verán.
As adegas galegas que asisten a este evento estarán agrupadas por denominacións de orixe (DO), cun espazo propio para as Rías Baixas e outro para Ribeiro. O resto de empresas que teñen referencia en varias DO estarán agrupadas na mesma zona. Na mesma área estarán os postos dos consellos reguladores de Monterrei e Valdeorras, que tamén contan con espazos propios.
No espazo da D.O. Valdeorras participan un total de 14 adegas con 17 brancos e 9 tintos, viños que se poderán degustar neste prestixioso foro. “Unha feira que se singulariza por dar todo o protagonismo ao produto, cun deseño innovador de gran impacto visual”, sinalaba José Luis García Pando, presidente de Consello Regulador.
De acordo con cifras da Xunta, o sector vitivinícola galego, entre as cinco DO e o catro indicacións xeográficas protexidas, con máis de 10.000 profesionais e case 500 adegas, aglutina un valor económico de case 300 millóns anuais.
