Por Europa Press / Redacción | Galicia | 27/02/2023 | Actualizada ás 15:49
A portavoz nacional do BNG, Ana Pontón, avanzou o inicio do proceso para a elaboración dunha lei galega dos dereitos culturais e do sistema público de cultura que, explicou, será resultado de "un proceso participativo que conte cos principais axentes implicados no sector".
Así o avanzou este luns nunha rolda de prensa na que estivo acompañada pola portavoz nacionalista de Cultura e Lingua, Mercedes Queixas. Alí, Pontón sinalou que nun momento de "transformación" despois de "40 anos da aprobación do Estatuto de Autonomía" é necesario "repensar e actualizar o sistema cultural galego con rigor".
Nesta liña, manifestou que "a pesar de representar un 2 por cento do PIB e un 3 por cento do emprego", en Galicia a cultura atópase "infrafinanciada e infravalorada" pola Xunta, xa que este sector "sufriu as políticas de recorte dunha maneira moi drástica ata situarse hoxe no 0,8 por cento do orzamento".
A continuación, Pontón detallou que esta lei estará baseada en tres principios fundamentais: garantir o dereito da cidadanía ao acceso á cultura; un orzamento digno para o sector co compromiso de incrementar os recursos ata o 2 por cento do orzamento galego anual; e redefinir o sistema institucional da cultura galega.
Así mesmo, asegurou que contará coa colaboración de asociacións e persoas expertas na materia e, ademais, tratará de actualizar o sistema cultural e o seu mapa de axentes, adaptar aos novos tempos as institucións culturais e promover a cooperación e coordinación entre o conxunto de administracións con competencias no sector.
SEIS MESAS DE TRABALLO
Ademais, Queixas afirmou que se trata dun proceso participativo que se centrará en varios eixos dos que se ocuparán seis mesas de traballo. En concreto, a primeira delas definirá os dereitos culturais da cidadanía e as obrigacións que derivan destes para o sistema público de cultura, mentres que a segunda tratará a protección sociolaboral do sector cultural e a garantía para os traballadores.
A maiores, a terceira dos meses estudará o financiamiento da cultura cara a ese 2 por cento do orzamento da Xunta e a cuarta dedicarase á avaliación das políticas culturais e análises dos datos. Finalmente, as dúas últimas tratarán a identidade cultural e as relacións co mundo global e a articulación do sistema público da cultura en Galicia desde a cooperación e a coordinación institucional.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.