Pontevedra terá o primeiro "cambiador inclusivo" certificado de Galicia
Estes cambiadores portátiles estarán equipados dun inodoro, ducha e padiola
Por Europa Press / Redacción | Pontevedra | 23/03/2023 | Actualizada ás 17:33
O concelleiro de Benestar Social de Pontevedra, Marcos Rey, anunciou que a cidade terá o primeiro cambiador inclusivo certificado de Galicia, orientado a persoas con necesidades especiais de asistencia na hixiene.
Así o trasladou nun comunicado o grupo municipal do PSdeG-PSOE, que avanzou a data da instalación do piloto dun destes espazos, o vindeiro luns, 27 de marzo, na Praza de Galicia, onde estará situado durante tres meses.
Segundo avanzaron, estes cambiadores portátiles estarán equipados dun inodoro, ducha e padiola, nun espazo duns 12 metros cadrados adaptados ás posibles necesidades de asistencia na hixiene destas persoas.
O edil socialista explicou que a idea é probar o funcionamento do cambiador nesa localización céntrica, de maneira que os usuarios poidan dicir que cousas se poden mellorar ou botan en falta e determinar así unha instalación que funcione de maneira definitiva.
Nesta liña, explicou que os baños estándar ou para persoas con discapacidade non ofrecen as ferramentas básicas que os cidadáns con diversidade funcional necesitan para utilizar un aseo de forma "fácil, autónoma e digna". Polo que, "se existen cambiadores para bebés, tamén debe de habelos para persoas que teñen outras necesidades".
O obxectivo futuro é a colocación de cambiadores inclusivos en todos os lugares públicos e privados estratéxicos ou de gran concorrencia de persoas, a incorporación do concepto de Cambiadores Inclusivos na normativa de accesibilidade.
