O PSdG reclama á Xunta retirar o recurso contra o imposto ás grandes fortunas por velo como "fiscalidade insolidaria"

A portavoz de Facenda do grupo parlamentario socialista, Begoña Rodríguez Rumbo, solicita á Xunta que retire o recurso presentado ante o Tribunal Constitucional contra o imposto ás grandes fortunas, e critica a "fiscalidade insolidaria" do Goberno galego, preocupado de "protexer a calquera costa aos máis ricos mentres castiga ás familias que teñen menos recursos".

Rodríguez Rumbo informa nun comunicado da presentación dunha serie de iniciativas parlamentarias para reclamarlle á Xunta que retire o citado recurso contra un imposto temporal deseñado para gravar ás fortunas de máis de 3 millóns de euros durante os exercicios 2022 e 2023.

Esta decisión, sinala a socialista, vai na liña dos beneficios fiscais que vén de aplicar o Goberno galego "para favorecer ás persoas que máis ingresos teñen, aumentando as bonificacións á cota do imposto sobre o Patrimonio ata o 50 % para os patrimonios de máis de 1 millón de euros".

Criticou que estas decisións "coinciden" coa retirada da Tarxeta Básica de axudas para produtos de hixiene, supermercado e farmacia a quen máis o necesita.

"Este recurso, unido ao paraugas social despregado polo Goberno de Pedro Sánchez, evitou que 127.000 persoas estivesen en risco de pobreza en Galicia en 2021, mentres o incremento das bonificacións ao Patrimonio supuxo un agasallo de 4.500 euros para 7.700 galegos e galegas que máis teñen".

A parlamentaria socialista sostén que "aquelas persoas que máis teñen deben contribuír un pouco máis en momentos difíciles para dar cumprimento ao mandato constitucional da progresividade na carga impositiva".