Por Galicia Confidencial | Compostela | 04/05/2023 | Actualizada ás 15:04
O presidente a Xunta, Alfonso Rueda, anunciou que se modificará a redacción do polémico artigo 5.1 do Anteproxecto de Lei de loita integral contra os incendios forestais tras a polémica suscitada sobre quen é o suxeito adecuado para informar dun lume forestal e pedir a Xunta de Goberno do Colexio Profesional de Xornalistas de Galicia (CPXG) a súa retirada.
O texto deste artigo recollía que "está prohibida para calquera persoa ou entidade pública ou privada a creación ou difusión de feitos ou datos falsos en relación cos incendios forestais por calquera medio, incluídas as redes sociais". Unha redacción que o CPXG considera que pode ser interpretada como unha limitación da liberdade de información, ao apuntar implicitamente á administración como única fonte autorizada. Por esa razón, solicitaba á Xunta de Galicia a súa retirada para evitar calquera posíbel lectura contra este dereito fundamental.
Na rolda de prensa posterior ao Consello da Xunta e preguntado ao respecto, Rueda coincidiu en que é necesario matizar o que é "información falsa", pero que ese artigo se refería a aquelas persoas que publican información falsa sobre un lume e isto provoca unha mobilización de medios e efectivos "que serían necesarios para outros lugares". "Isto hai que sancionalo e a isto se refire a lei, de mobilizar recursos que podían ir a outros sitios", xustificou.
Con todo, recoñeceu que, quizais, o texto non estea ben redactado e dá motivo a que haxa malentendidos. "Todo o que sexa mellorar a redacción pois se fará porque está en fase de revisión", apuntou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.