Case un de cada catro galegos ten máis de 70 anos
O 32,4% da poboación galega terá máis de 65 anos en 2037.
Por Europa Press / Redacción | SANTIAGO DE COMPOSTELA | 12/05/2023 | Actualizada ás 11:59
A poboación galega de máis de 65 anos suporá un terzo do total (o 32,4%) en 2037, o que supón seis puntos máis que na actualidade (26,1%), segundo os datos publicados polo Instituto Galego de Estatística (IGE) este venres.
Esta estatística sobre lonxevidade mostra o progresivo envellecemento da sociedade galega e as súas previsións. Así, mentres en España hai 100 persoas de máis de 65 anos por cada 100 menores de 20 anos, esa cifra elévase a 167,3 en Galicia, pero a proxección vaise ata 251 maiores por cada 100 mozos en 2037 en Galicia.
No tocante á estrutura de poboación dos maiores galegos, actualmente o grupo entre 70 e 74 anos representa o 22,2%, pero prevese que nos próximos 15 anos este perda certo peso, cunha alza entre os 80 e 84 anos.
Os galegos de 65 ou máis anos viven maioritariamente en fogares compostos unicamente por persoas dese grupo de idade, coa provincia de Ourense como a de maior taxa. O 54,7% dos maiores de 65 anos vive só, mentres que o 40% habita coa súa parella sen fillos. Só unha 5,2% conta cun fogar doutro tipo.
A esperanza de vida dos galegos que ten 65 anos é de 21,7 anos, con diferenzas por sexos, pois é de 23,7 anos para as mulleres e de 19,4 anos para os homes. A principal causa de defunción dos maiores de 65 anos é a relacionada con enfermidades do sistema circulatorio (30,5%), seguida de tumores (23,5%).
O número de pensionistas de 66 ou máis anos en Galicia supera o medio millón de persoas desde o 2009. O importe medio anual entre os 66 e 75 anos é de 16.928 euros (por baixo dos 18.893 euros de España) e entre os maiores de 75 anos a cifra baixa a 13.119 euros (en España son 14.984 euros).
