Galicia rexistra a segunda maior caída de creación de empresas en maio, segundo os rexistradores
Por E.P. | Compostela | 12/06/2023 | Actualizada ás 13:48
Galicia rexistra a segunda maior caída de creación de empresas en maio, cun 6,9% menos, só por detrás de Navarra (-8%), segundo datos do Colexio de Rexistradores. Este retroceso contrasta con que as constitucións de empresas aumentaron un 12,9% en España en maio en comparación ao mesmo mes do ano anterior, ata as 10.458 empresas creadas, o que supón cinco meses consecutivos de incrementos.
Por territorios, Andalucía, Cataluña e Madrid, constituíron conxuntamente seis de cada dez empresas creadas, aínda que as constitucións en maio aumentaron en todas as comunidades autónomas salvo en Navarra (-8%), Galicia (-6,9%) e A Rioxa (-5,4%).
Doutra banda, no que respecta ao acumulado do ano, a constitución de empresas foi un 11% maior á do mesmo período do ano anterior, ata as 51.045 empresas constituídas en España entre xaneiro e maio de 2023, segundo datos de Informa D&B.
Por sectores, construción e actividades inmobiliarias, comercio e servizos empresariais foron onde máis creacións se rexistraron neste cinco meses, con 11.951, 9.583 e 7.518, respectivamente. Entre os tres supuxeron o 57% das empresas constituídas no acumulado do ano, unhas cifras que melloraron en todos os sectores, coa única excepción da administración, que recortou un 33%.
