Manuel Jabois será o pregoeiro da XXIV Feira do Viño de Valdeorras
“Estamos expectantes por coñecer o que ten que dicir sobre o godello e sobre o resto de variedades da nosa denominación de orixe", comenta o presidente do Consello Regulador, José Ramón Rodríguez.
Por Galicia Confidencial | Vilamartín de Valdeorras | 24/06/2023 | Actualizada ás 09:00
A XXIV Feira do Viño de Valdeorras terá un pregoeiro de luxo. O xornalista e escritor Manuel Jabois, nado en Sanxenxo en 1978, será o encargado de falarlle aos viños deste territorio amparado no escaparate vitivinícola que se celebrará os vindeiros 8 e 9 de xullo no recinto feiral de Viloira, no Concello do Barco.
O pregón de Jabois está será o sábado 8 pola mañá, inmediatamente antes do acto institucional de apertura da feira. “A súa talentosa prosa, plasmada en numerosas columnas e artigos de opinión e en máis de media ducia de obras, entre as que se inclúen varias novelas, e a súa aguda e escéptica mirada da actualidade foron dúas das razóns determinantes para a escolla de Manuel Jabois como pregoeiro desta edición da feira do viño”, destaca o presidente do Consello Regulador, José Ramón Rodríguez.
“Estamos expectantes por coñecer o que ten que dicir sobre o godello e sobre o resto de variedades da nosa denominación de orixe quen, sen dúbida, é un dos autores máis notables do panorama español actual”, engade o máximo responsable do organismo vitivinícola.
MANUEL JABOIS
Manuel Jabois gañou en 2003 o Premio Nacional de Xornalismo Xulio Camba. Durante a súa dilatada carreira, escribiu para diferentes cabeceiras galegas e estatais e na actualidade colabora habitualmente con varios dos medios do Grupo Prisa. Conta, ademais, con sete obras publicadas por diferentes editoriais entre as que se atopan as novelas Malaherba ou Miss Marte.
