O 061 aconsella ter precaución co alcol, a condución e o lume das fogueiras para a noite de San Xoán
É importante elixir o sitio correcto onde facer as 'cacharelas', que non deben ser lugares pechados nin tampouco nas proximidades de cableado de alta tensión.
Por E.P. | A Coruña | 23/06/2023 | Actualizada ás 18:06
A Fundación Urxencias Sanitarias de Galicia-061 recomenda para a noite San Xoán ter precaución co consumo do alcol, coa condución e co lume das fogueiras para evitar incidentes. O ano pasado, este servizo de emerxencias atendeu na noite do 23 ao 24 de xuño --entre as 21,00 e as 9,00 da mañá-- un total de 69 intoxicacións etílicas ou por drogas, cinco accidentes de tráfico con outras tantas persoas implicadas e catro queimaduras.
Segundo informa a través dun comunicado, o 061 volverá reforzar o seu persoal para esta noite tan sinalada ante o previsible incremento da demanda sanitaria. Por iso, en caso de acudir a esta festividade, Urxencias Sanitarias aconsella ter en conta que as fogueiras supoñen "un compoñente de perigo, tanto polo lume como polo fume".
Por iso, é importante elixir o sitio correcto onde facer as 'cacharelas', que non deben ser lugares pechados nin tampouco nas proximidades de cableado de alta tensión. Ademais, o 061 chama a non usar líquidos inflamables nin botar ao lume envases herméticos, sprays, pilas nin manipular petardos preto. Tamén recomenda ter a man extintores ou auga e evitar que os nenos se acheguen.
Neste contexto, é aconsellable situarse de costas á dirección do vento, especialmente para aquelas persoas que sofren algunha patoloxía respiratoria. Á hora de saltar as fogueiras, deberase facer sen pezas de roupa sintéticas --preferentemente, de algodón-- e, se a vestimenta arde, non hai que correr, senón tirarse ao chan ou quedar quieto mentres se apague.
En caso de queimaduras, débese alertar ao 061 inmediatamente. Mentres non chega a axuda, o médico que colla a chamada dará os consellos necesarios. Por norma xeral, é útil lavar con abundante auga a zona afectada se a queimadura non é moi grande. Se é extensa, non se debe empregar auga fría por risco de hipotermia. Urxencias Sanitarias tamén lembra que non se debe realizar desprazamentos en coche se se consumiu alcol ou drogas, posto que favorecern os accidentes de tráfico.
DATOS DO ANO PASADO
En canto ás incidencias rexistradas na noite de San Xoán do pasado ano, a provincia da Coruña foi a que máis intoxicacións etílicas ou por drogas contabilizou, cun total de 39. Seguiulle Pontevedra con 21, Ourense con cinco e Lugo con catro.
En total, foron 69 intoxicacións polas que o 061 de Galicia desprazou dúas ambulancias asistenciais de soporte vital avanzado e mobilizou ata en 43 ocasións as de soporte vital básico. De todas as atendidas, 36 persoas non requiriron traslado, mentres que 10 foron derivadas a un centro de saúde e 23 ao hospital.
No que respecta ás queimaduras, o 061 atendeu catro no San Xoán pasado: tres na Coruña e un en Pontevedra. Dous dos afectados acabaron no hospital, un foi a un centro de Atención Primaria e o outro foi atendido no punto. A isto hai que sumar cinco accidentes de tráfico con outros tanto implicados --tres na Coruña e dous en Pontevedra--, con tres trasladados ao hospital e dous atendidos no propio lugar do sinistro.
