Ribeira, Muros, Mazaricos e Corcubión súmanse ás 36 alcaldías que ocupará o BNG durante este mandato
Por Europa Press / Redacción | SANTIAGO DE COMPOSTELA | 07/07/2023 | Actualizada ás 19:01
O BNG sumou este venres catro novas alcaldías tras a constitución dos concellos coruñeses de Ribeira, Muros, Mazaricos e Corcubión, que se suman aos 32 municipios que nestes momentos teñen un rexedor da formación nacionalista.
Nun comunicado emitido tras a investidura de Luís Pérez (Ribeira), María Lago (Muros), Xabier Domíngez, Drok (Corcubión) e Juan José Blanco (Mazaricos); o Bloque celebra as 36 alcaldías que ostenta, entre elas, a de Santiago con Goretti Sanmartín e a de Pontevedra co veterano Miguel Anxo Fernández Lores.
Para a formación, ter o bastón de mando en localidades nas que residen case 400.000 galegos é "unha marca que evidencia que o Bloque está no mellor momento da súa historia". O BNG celebra especialmente a consecución da Alcaldía de Ribeira, a "principal vila do Barbanza" que, coa chegada do nacionalista Luís Pérez grazas a un pacto de goberno con PBBI e PSOE, "pon fin a 36 anos de gobernos da dereita".
Tamén festexa a revalidación da maioría absoluta en Mazaricos que permite continuar catro anos máis a Juan José Blanco, alcalde desde 2015; así como a elección como primeiros edís de María Lago en Muros, onde o Bloque liderará equipo de goberno co PSOE, e de Xabier Domínguez en Corcubión, municipio que os nacionalistas xestionarán en solitario.
Así as cousas, o Bloque suma 18 maiorías absolutas en concellos galegos --Carballo, Moeche, San Sadurniño, Santiso, Toques, Zas, A Pobra de Brollón, Catoira, Moaña, Mondariz-Balneario, Tomiño, Allariz, A Mezquita, Montederramo, A Teixeira, Verea, Vilar de Santos e, desde este venres, Mazaricos--.
Pola súa banda, lidera os gobernos de coalición en Santiago e Pontevedra, ademais de en Arzúa, Fene, Barreiros, Muras, Samos, Soutomaior, Barro, Bueu, Cangas, Pontecesures, O Rosal, A Rúa e Vilar de Barrio, ademais dos mencionados Ribeira, Muros e Corcubión.
