O consumo de auga da billa continúa restrinxido na Rúa por detectarse outra bacteria
A rexedora María González Albert, explicou que o Concello mantivo unha reunión con Sanidade na que se decidiu, de forma conxunta, facer unha nova desinfección "de choque" e unha "hipercloración".
Por E.P. | SANTIAGO DE COMPOSTELA | 15/07/2023 | Actualizada ás 14:10
O consumo de auga da billa continúa restrinxido no municipio ourensán da Rúa tras detectarse outra bacteria despois dos labores de limpeza realizadas ao rexistrarse a principios de mes un brote de gastroenterite entre os veciños.
En declaracións a Europa Press, a alcaldesa da localidade, María González Albert, explicou que se tiveron que "ampliar as restricións" tendo en conta que, aínda que as bacterias detectadas a pasada semana xa non aparecen, detectouse unha distinta.
Ante iso, a rexedora explicou que o Concello mantivo unha reunión con Sanidade na que se decidiu, de forma conxunta, facer unha nova desinfección "de choque" e unha "hipercloración" que se está levando a cabo este fin de semana. Tras iso, o vindeiro martes repetiranse as analíticas para comprobar se a auga é apta para o consumo.
Preguntada sobre a posible orixe desta nova bacteria, González Albert explicou que os técnicos indicaron que despois dos labores de desinfección realizadas con motivo da gastroenterite é habitual que se poidan soltar partículas impregnadas nas paredes dos depósitos que "ata agora non aparecían" nas analíticas. Por iso, explicou que se procederá á citada desinfección de choque e á hipercloración.
Estas restricións non afectan ao municipio na súa totalidade, xa que hai unha zona, a da Rúa Vella, independizada. Precisamente por iso, o Concello habilitou dúas fontes para que os veciños que así o desexen poidan recoller auga.
