PSdeG denuncia o "cinismo" da Xunta ao criticar atrasos en infraestruturas que bloquea sen dar permisos

A portavoz de Infraestruturas do Grupo Socialista, Patricia Otero, denunciou no Parlamento o "cinismo e hipocrisía" políticos do PP e o Goberno galego tras "constatar que bloquearon as obras da autovía Santiago-Lugo durante catro meses e medio para acusar o Goberno central dos atrasos durante a campaña electoral".

Segundo explican nun comunicado, Otero presentou unha batería de iniciativas parlamentarias tras facerse público que Augas de Galicia, un organismo dependente da Xunta que regula as concas fluviais, "bloqueou desde abril ata o pasado 30 de agosto o permiso para o retranqueo do río Ladrón".

Insisten en que este permiso, solicitado polo Goberno central no mes de abril, "era clave para avanzar nas obras dun viaduto no tramo Arzúa - Melide da A - 54". A este respecto, a parlamentaria socialista criticou a "cara dura política" do PP e da Xunta, "que empregaron o atraso da obra que eles mesmos estaban a provocar como argumento electoral contra a xestión do Goberno central".

Lembrou que esta infraestrutura foi empregada como eixo dunha campaña desde setembro de 2022, "terxiversando a realidade dos feitos contra a xestión do Goberno central". Así, Otero lamentou "o empeño do PP en esconder a súa verdadeira intención de bloquear calquera avance nas infraestruturas" para Galicia e neste caso para a provincia de Lugo, "con mostras de política basta de baixo nivel coa que o único que conseguen é prexudicar á cidadanía".

Proxecto do Orbital de Santiago entre a AP-9, coa A-54 e o aeroporto de Lavacolla | Fonte: Ministerio de Fomento.