Por E.P. | SANTIAGO DE COMPOSTELA | 12/09/2023 | Actualizada ás 15:02
O servizo de autobús de Santiago sufriu esta mañá algúns problemas que están vinculados ás avarías e ao estado da actual frota de vehículos. Desta forma, algúns pasaxeiros sinalaron que nas pantallas estimaban o tempo no que debería efectuarse o servizo pero que non chegaba.
Así, fontes do goberno local lembraron que na xunta de goberno aprobouse o aluguer de 12 autobuses e esperan que empecen a funcionar ao longo deste mes. Con todo, remarcaron que un dos motivos polos que trataron de axilizar o aluguer dos vehículos, que estaba previsto para novembro e decembro, foi debido ao estado da frota.
Así mesmo, indicaron que os informes periciais de agosto sinalaron que non se podía garantir o "correcto funcionamento" dalgúns dos vehículos e que urxía a súa renovación unha vez que entrasen en vigor os horarios de inverno xa que esixen utilizar máis autobuses que durante o verán.
OPERACIÓN PELETEIRO
Noutra orde de cousas, a concelleira de Capital Cultural de Santiago, Míriam Louzao, a preguntas dos medios sobre a reunión en relación ao futuro da parcela do antigo colexio Peleteiro e as críticas dos portavoces do resto de grupos por carecer de información, sinalou que "seguen traballando" sobre o asunto e no momento que haxa algunha novidade comunicarana. Con todo, avanzou que a xunta de portavoces xa está datada e será o día 19.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.