Galicia rexistrou unha subida do 60 % nos avisos por velutinas e retirou un 40 % máis de niños que en 2022

O vicepresidente primeiro e conselleiro de Presidencia, Diego Calvo, informou este mércores en resposta á deputada Carmen Aira (BNG), de que se rexistrou unha subida do 60 por cento nos avisos por velutinas no que vai de ano e, neste mesmo período, retiráronse un 40 por cento máis de niños que no mesmo de 2022. A parlamentaria nacionalista denunciou que pese ao incremento e a alarma social por esta especie, non se atenderon as peticións da cidadanía en tempo e reclamou previr o aumento da presenza destas avespas para actuar canto antes.

Na súa resposta, Diego Calvo defendeu a dilixencia do operativo e explicou que se puxo en marcha un teléfono específico (012), á marxe doutras vías de comunicación como un chatbot, que atende as chamadas e desvía as de gravidade ao 112. Neste sentido, defendeu que a Xunta reforzou en máis do 50 por cento o persoal de Seaga destinado á retirada de niños de avespa velutina. Así, rexistráronse máis de 43.000 avisos fronte aos 27.500 do ano pasado. Deles, 36.500 foron xestionados por Seaga, que ten encomendados 311 concellos (dos 313 que hai en Galicia) adheridos. En canto aos efectivos, pasouse de 42 a 85.

Dos 36.500 casos xestionados por Seaga, un total de 20.800 correspóndense con niños retirados, un 40 por cento máis. Ademais, en 2.500 casos, tratábase de niños inactivos e en 6.700 casos non procedía actuar porque eran especies distintas á velutina, mentres que 2.400 supostos eran avisos duplicados xa comunicados por outras persoas.

A deputada do BNG avisou de que cada vez hai "máis ataques a persoas" e a poboación sofre "tensión" pola presenza "masiva" desta especie invasora, mesmo "familias enteiras que se acaban indo das súas vivendas". "Deben prepararse para abordalo e para o futuro", reclamou a parlamentaria do BNG, quen esixiu "medidas urxentes e xa".

Vespa velutina | Fonte: Arquivo