Un home rompe cun pau os cristais dun autobús con pasaxeiros en Boiro
En Ames un home foi trasladado con síntomas de inhalación de fume tras apagar un lume na súa casa
Por Europa Press / Redacción | SANTIAGO DE COMPOSTELA | 17/12/2023 | Actualizada ás 20:15
Un home rompeu, na mañá deste domingo, cun pau os cristais dun autobús con pasaxeiros na rúa Principal do concello coruñés de Boiro. Primeiro, o individuo cunha barra de grandes dimensións partiu o portelo do condutor e a continuación ensañouse co cristal dianteiro do vehículo.
Os pasaxeiros que realizaban a ruta no momento do suceso puideron gravar o ocorrido e o vídeo xa circula polas redes sociais. Nel pode verse a un home vestido cunha chaqueta escura, uns vaqueiros e unhas zapatillas brancas. Así, tras arremeter contra o vehículo, o home tirou o pau e afastouse camiñando do lugar.
EVACUADO EN AMES
Un veciño do municipio coruñés de Ames foi trasladado este domingo con síntomas de inhalación de fume tras apagar un lume na súa vivenda situada na urbanización Pena Dourada, en Ventosa.
Segundo informou o 112, foi ao fío das 14,00 horas deste domingo cando os afectados chamaron para pedir axuda. Cando chegaron os equipos de emerxencias, o incendio estaba apagado, pero a persoa necesitaba asistencia médica e foi evacuado ao Hospital Clínico de Santiago.
Ao lugar acudiron os voluntarios de Protección Civil de Ames, membros do GES de Brión e Bombeiros de Boiro. Tamén foron informados os Bombeiros de Santiago. Con todo, cando chegaron o lume estaba extinguido xa que os propios afectados atallaron as chamas cun extintor.
