Detido un veciño de Moaña por roubar nunha vivenda da localidade

A Garda Civil detivo a un home, veciño do municipio pontevedrés de Moaña como presunto autor dun roubo con forza nunha vivenda da localidade. Segundo informou o Instituto Armado, a investigación comezou tras unha denuncia interposta o pasado 23 de decembro e días despois, tras varias indagacións e pescudas, localizaron e detiveron a un home de 51 anos como presunto autor dos feitos.

Así, recuperaron parte dos obxectos subtraídos, que foron vendidos nun establecemento de segunda man e que devolveron ao seu propietario, tales como un casco e roupa apropiada para circular en moto. O detido, con antecedentes contra o patrimonio, foi posto a disposición xudicial xunto coas dilixencias instruídas, no Xulgado de Primeira Instancia e Instrución número dous de Cangas do Morrazo, que decretou a súa liberdade, pendente de acudir a xuízo.

Unha axente da Garda Civil, de costas | Fonte: GARDA CIVIL - Arquivo