Os incendios forestais facilitan a substitución de especies autóctonas dos montes galegos por outras exóticas

Unha tese de doutoramento (con sobresaliente 'cum laude') de Sheila F. Riveiro, investigadora da Universidade de Santiago de Compostela (USC), apunta a que os incendios forestais facilitan o desprazamento de especies nativas dos montes de Galicia e Portugal.

Este estudo senta as bases para o control de especies exóticas invasoras nos ecosistemas. O estudo identifica os factores chave que axudan ao asentamento de invasoras tras o lume. A investigación 'Bases ecolóxicas para o control de especies exóticas invasoras en relación co lume' sinala como o lume é un modelador da paisaxe e "pode provocar cambios drásticos" nos ecosistemas, xa que provoca efectos como a entrada de especies exóticas.

Unha vez descrito no laboratorio o comportamento invasor destas especies e achado o método polo cal adquiren unha vantaxe competitiva sobre as nativas, a investigadora pertencente ao grupo de referencia competitiva Biodiversidade e Botánica Aplicada (Bioaplic), propón a través dun estudo de campo métodos de control para as principais invasoras de Galicia e Portugal, como as acacias, o eucalipto ou a albicia.

Os métodos avaliados adáptanse ao contexto de lumes de Galicia e ás características das especies estudadas, entre os que destaca a necesidade de métodos de control a longo prazo que teñan como fin último a eliminación do banco de sementes das especies co fin de evitar a súa rexeneración. Dirixida pola profesora da Facultade de Bioloxía Otilia Reyes, esta investigación contou co financiamento do programa de axudas á etapa predoutoral e encádrase nos proxectos Fireseves e Fogo e Invasoras.

Bosque de eucaliptos | Fonte: EP - Arquivo