Por E.P. | SANTIAGO DE COMPOSTELA | 23/01/2024 | Actualizada ás 13:20
O candidato do PSdeG á Presidencia da Xunta, José Ramón Gómez Besteiro, asegurou que a primeira medida que tomará como presidente do Goberno galego será "aplicar a gratuidade dos libros de texto na educación obrigatoria" para todos os nenos que estuden en centros públicos ou concertados e comprometeuse a ampliar a FP dual a todas as especialidades.
Así o anunciou este martes nun acto en Santiago de Compostela, no que lembrou que a gratuidade dos libros foi a primeira medida que aprobou o goberno socialista de Touriño e a primeira que "tombou" o PP de Feijóo e Rueda. "Será a primeira que recupere", dixo.
Esta política, conforme indicou, suporá un aforro para as familias dunha media de 600 euros por escolar só ao comezo do curso. Un desembolso importante que é necesario cubrir, segundo Besteiro, porque "a igualdade de oportunidades pasa, necesariamente, por unha educación pública de calidade e gratuíta".
O dirixente socialista anunciou, así mesmo, unha nova lei de educación de Galicia que contemple as novas necesidades como a loita contra o acoso e o ciberacoso escolar; a prestación de servizo de atención psicolóxica gratuíta e a inclusión do alumnado con necesidades educativas especiais con reforzo de profesorado especializado e dotación de recursos.
FORMACIÓN PROFESIONAL DUAL
Ademais, expuxo a súa proposta para a Formación Profesional Dual, que o PSdeG impulsará "en todas as titulacións e con novas modalidades, especialmente as estratéxicas, como as vinculadas aos sectores produtivos máis implantados no país.
MATRICULAS UNIVERSITARIAS
No acto tamén se referiu ao anuncio do presidente da Xunta, Alfonso Rueda, de que a primeira matrícula sexa gratis. "Nunca é tarde", lembrou para sinalar que o PSOE levou esta medida ao Parlamento, que foi rexeitada en varias ocasións polo PP.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.