Por Europa Press / Redacción | SANTIAGO DE COMPOSTELA | 31/01/2024 | Actualizada ás 12:05
O conselleiro de Sanidade, Julio García Comesaña, defendeu os investimentos e a xestión do seu departamento para criticar a manifestación convocada para o domingo en Santiago pola Plataforma SOS Sanidade Pública, que busca "seguir desprestixiando" ao Servizo Galego de Saúde (Sergas).
"Mentres uns investimos en tecnoloxía e nos mellores tratamentos posibles para os pacientes, outros invisten en financiar autobuses, pancartas e escenarios para seguir desprestixiando a sanidade pública", recalcou García Comesaña este mércores, ao ser preguntado sobre esta protesta.
O conselleiro recoñeceu que "todo é mellorable, evidentemente", pero reivindicou que a sanidade pública en Galicia "está nun nivel excelente". Como exemplo puxo o centro de terapias CAR-T contra o cancro situado no Campus Sur de Santiago que, precisamente, visitou na mañá deste mércores e que en próximas semanas poderá acoller aos primeiros pacientes.
"Podemos ver este centro hoxe, mañá ir a un centro onde hai un robot cirúrxico ou pasadomañá onde hai un PET instalado", enumerou o titular de Sanidade, para negar que se poida falar de "privatización e desmantelamento" no Sergas.
Ademais, contra as afirmacións da Plataforma SOS Sanidade Pública --na que están incluídos non só os partidos da oposición, senón tamén sindicatos e diferentes colectivos de traballadores e pacientes--, García Comesaña asegurou que hai "os mesmos pediatras que houbo sempre, máis de 700 profesionais en Atención Primaria ou 6.000 traballadores máis no Sergas".
O conselleiro admitiu que hai "un problema" con "a falta de médicos", pero matizou que "curiosamente" os que "financian as manifestacións, os autobuses e as cuñas publicitadias son os que sistematicamente votan que non ás medidas" que a Xunta pon encima da mesa. "Terán que explicalo eles", concluíu.
REPRESENTANTE DE SOS SANIDADE PÚBLICA INSTAN A MOBILIZARSE
Representantes de SOS Sanidade Pública na Coruña instaron á cidadanía a mobilizarse este domingo, día 4, en Santiago de Compostela contra a "deterioración" da sanidade en Galicia e en defensa da que cualificaron como "a xoia da coroa da política social".
Foi nunha rolda de prensa con presenza do portavoz da plataforma e médico de familia Ramón Beiras e doutro dos integrantes, Demetrio Vázquez. Ambos demandaron o apoio da cidadanía de face a "encher" a cidade compostolena este domingo, nunha mobilización que partirá ás 13,00 horas da Alameda. No chamamento á mobilización, incidiron en que se trata dunha manifestación convocada antes de que se coñecese a data das eleccións autonómicas. "Vai para calquera goberno que estea", sentenciou Demetrio Vázquez, quen denunciado "falta ao acceso sanitario".
Da convocatoria, dixo que busca "defender" a sanidade pública galega e reclamar melloras fronte á situación actual, na que citou listas de espera, "saturación importante en Atención Primaria" ou falta de especialistas, dixo, en saúde mental, entre outras áreas.
Pola súa banda, Ramón Beiras, xa sobre a situación xerada en urxencias polos casos de gripe, ha apunado a un problema "estrutural". "Hai que acabar coa incompetencia na xestión deste goberno, o que pasou coa gripe é en gran parte debido á mala xestión da Consellería", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.