Pontón cre que o PP vai "de bandazo en bandazo" polo "nerviosismo" a que o BNG goberne a Xunta

A candidata do BNG á presidencia da Xunta, Ana Pontón, afirmou que o PP vai "de bandazo en bandazo" e que "leva toda a semana atacando a Cataluña e agora resulta que é o señor Feijóo quen quere indultar a Puigdemont".

Así se manifestou este domingo a preguntas dos medios antes de participar nun acto de campaña en Ferrol, despois de que varios medios publicasen este sábado a última hora que Feijóo estaría aberto a un indulto a Puigdemont condicionado a que sexa xulgado e rexeite a vía unilateral e de que, instantes despois o PP matizase que as súas condicións "non se deron cos indultos do procés".

Para a líder do Bloque, na campaña das eleccións galegas o PP "apertou o botón do pánico" e "está absolutamente desnortado". "O que nos está dicindo co seu nerviosismo é que un puñado de votos poden decantar a presidencia cara ao BNG", reivindicou.

Así, insistiu en que "o importante" é unir na papeleta do BNG "todo ese voto que quere cambio". "Creo que Feijóo é cada día máis pasado, o PP vai ser pasado o 18 de febreiro e Galicia vai ter un goberno que mire para o futuro con esperanza, con ilusión e traballando por mellorar a vida das persoas", resolveu.

"ESTE É O MOMENTO"

Ante un abarrotado Auditorio Municipal de Ferrol, a candidata do BNG á presidencia da Xunta, Ana Pontón, asegurou que sente "que hai unha enorme ilusión e esperanza depositada" na candidatura nacionalista, algo que, engadiu, "confirman" os actos e "tamén as enquisas". "Este é o momento de unirnos en torno ao BNG, hai que apostalo todo a esta papeleta para que o próximo 18 de febreiro abramos un tempo novo en Galicia", manifestou.

"Quero pedirlles a oportunidade, humildemente, de que me permitan ser a presidenta a partir do próximo 18 de febreiro, a presidenta dos galegos e as galegas para construír un país maior, para defender a sanidade pública, para pór en marcha un novo modelo de coidados", expuxo a nacionalista. Así mesmo, a líder do BNG sinalou que poden "facer historia e facer por primeira vez a unha muller presidenta, que poña en marcha esa Galicia que queremos e esa Galicia que soñamos" tras 15 anos cun Goberno do PP "que non ten nin proxectos, nin ideas, nin ilusión".