Nova liña de axudas ao sector audiovisual para organizar laboratorios e residencias

A Xunta de Galicia publicou no Diario Oficial de Galicia as bases e a convocatoria dunha nova liña de subvencións dirixida ao audiovisual galego, coa que se destinan 200.000 euros á organización, por parte de entidades privadas, de laboratorios, incubadoras ou residencias. O obxectivo destas subvencións, que se suman en 2024 ao programa anual de axudas ao sector da Consellería de Cultura, Educación, FP e Universidades, é impulsar a formación e o asesoramento tanto na creación como no desenvolvemento de novos proxectos para cinema e televisión.

Neste sentido, e tal e como explican nun comunicado, entronca nos seus obxectivos coa tamén nova convocatoria para a escritura de guións e coas dirixidas á promoción do talento audiovisual galego e ao desenvolvemento de proxectos. No que respecta a laboratorios e residencias, búscase contribuír á xestación e mellora de novas propostas para garantir a calidade e a solidez necesarias no seu camiño á fase de produción e, así, á súa viabilidade artística, técnica e financeira.

O programa tamén estende o seu apoio á atracción de rodaxes e á produción e coprodución audiovisual, así como á organización de festivais, á exhibición nas salas de cinema galegas e á comercialización e difusión de obras fóra de Galicia. As bases destas novas axudas a laboratorios, incubadoras e residencias, que poderán solicitarse ata o próximo 11 de abril, establecen unha porcentaxe de apoio de ata o 80 % do orzamento subvencionable, cun límite de 50.000 euros por encontro, para financiar diferentes gastos relativos á organización deste tipo de encontros desde este luns ata o 15 de agosto de 2025.

Entre outros requisitos, deben contar cunha edición xa celebrada na que participasen, como mínimo, dous proxectos de creación e/ou produción galega. Para a súa concesión, en réxime de concorrencia competitiva, establécese un baremo de propostas galegas incluídas na edición inmediatamente anterior como a porcentaxe que se lles reserva naquela para a que se solicita a subvención. Tamén se terá en conta a porcentaxe reservada especificamente a proxectos de autoría feminina.

Butacas nunha sala de cinemas | Fonte: E.P. - Arquivo