Por E.P. | SANTIAGO DE COMPOSTELA | 02/04/2024 | Actualizada ás 18:13
O Concello de Cariño levantou a prohibición de consumo de auga en varias parroquias nas que permanecía vixente desde principios do mes de marzo, cando as análises na estación de tratamento de O Castro detectaron elevados valores de trihalometanos.
Deste xeito, o consumo da rede de abastecemento volve estar permitido desde a tarde do luns nas parroquias de Cariño e A Pedra unha vez que as analíticas sinalaron unha mellora das condicións da auga, que xa foi notificado á Consellería de Sanidade. Nun comunicado, o goberno local de Cariño destaca que desde o momento en que se formalizou a restrición do consumo iniciáronse unha serie de actuacións para "incidir na mellora da composición do líquido".
Así, o concello que encabeza a alcaldesa Ana María López instou á adxudicataria a axilizar a intervención na estación de tratamento e levou a cabo un purgado da rede ante as sospeitas de que un dos cóbados do circuíto podía ter acumulados trihalometanos.
Ademais, o goberno local aclara que os resultados positivos das analíticas foron obtidos o pasado 22 de marzo pero "a acumulación de días non lectivos" por Semana Santa "fixo imposible que puidese xestionar con Sanidade o fin da prohibición".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.