A folga de ambulancias na área sanitaria de Pontevedra comeza este mércores co 100 % de servizos mínimos
Para atender esta demanda, a Consellería de Sanidade acordou que o número de vehículos de transporte sanitario dispoñibles como servizo esencial para as xornadas de folga sexa de 24 vehículos en total. A CIG comunicou a convocatoria dunha folga para os días 17, 24, 26 e 30 de abril e 2 de maio, que afectará o persoal da empresa Ambulancias Civera, S.L.
Por Europa Press / Redacción | PONTEVEDRA | 16/04/2024 | Actualizada ás 15:02
A CIG comunicou a convocatoria dunha folga para os días 17, 24, 26 e 30 de abril e 2 de maio, que afectará o persoal da empresa Ambulancias Civera, S.L., que presta servizos na área Sanitaria de Pontevedra e O Salnés, para a que a Consellería de Sanidade estableceu o 100 % de servizos mínimos. Segundo se recolle no Diario Oficial de Galicia (DOG), o ámbito da folga abarca o transporte sanitario non urxente, tanto ambulatorio como hospitalario, e o hospitalario urxente organizado e xestionado pola Dirección desta área sanitaria.
Con carácter xeral, as modalidades de transporte sanitario que inclúe esta prestación son os traslados de persoas enfermas ambulatorias aos centros sanitarios; os ingresos hospitalarios; altas e traslados para a realización de consultas probas e tratamentos; ou o traslado entre comunidades autónomas, entre outros servizos.
Para atender esta demanda, a Consellería de Sanidade acordou que o número de vehículos de transporte sanitario dispoñibles como servizo esencial para as xornadas de folga sexa de 24 vehículos en total. "Os servizos mínimos que se fixan resultan imprescindibles para manter a necesaria cobertura asistencial respecto ao transporte sanitario a través da empresa afectada pola folga, coa finalidade de evitar que se produzan prexuízos graves para a saúde da cidadanía", expón.
