O PP, en alerta ante a xuntanza de dez alcaldías das mareas
O seu secretario xeral, Alfonso Rueda, pide datos do acto "Cidades polo Ben Común" para ver se denuncia ante a Xunta Electoral. Di que pode ser un acto electoral encuberto de Podemos.
Por Galicia Confidencial | Compostela | 28/11/2015 | Actualizada ás 15:30
O PP analizará todo o relativo á celebración do foro "Cidades polo Ben Común" para ver se procede a denuncia ante a Xunta Electoral xa que critica a presencia de representantes de Podemos, como Íñigo Errejón, nun mitin na Coruña.
"Non sabemos moi ben se é un acto de partido pago con fondos públicos, o cal sería ilegal, ou un acto oficial con tintes partidistas, o cal tampouco se podería producir no período no que estamos, de precampaña", apuntou o secretario xeral do PP de Galicia, Alfonso Rueda.
"Resulta estrano que o responsable da Secretaría Política de Podemos, Íñigo Errejón, que se atopa en Galicia, anunciase que quería sumarse pola tarde a este encontro, que se supón que é de rexedores... A ver se dá a circunstancia de que Podemos convida e os cidadáns pagan", criticou.
Neste sentido, vinculou directamente ás Mareas e Podemos. "Todo vén sendo un pouco do mesmo, moito máis en período electoral", indicou.
