O Exército despregará 30 patrullas militares desde o 15 de agosto para vixiar os montes galegos
Para contribuír á prevención de incendios forestais.
Por Europa Press / Redacción | SANTIAGO DE COMPOSTELA | 31/07/2024 | Actualizada ás 14:02
As Forzas Armadas volverán despregarse nos montes de Galicia este verán, a partir do 15 de agosto, cun operativo de 30 patrullas e medios aéreos non tripulados de vixilancia para contribuír á prevención de incendios forestais.
Os detalles da nova campaña da operación 'Centinela Galego' foron presentado este mércores nunha rolda de prensa na que participaron o subdelegado do Goberno en Pontevedra, Abel Losada, a conselleira do Medio Rural, María José Gómez, o xeneral da Brigada "Galicia" VII (BRILAT), Alfonso Pardo de Santayana, o director xeral de Defensa do Monte, Manuel Rodríguez e o director xeral de Emerxencias e Interior, Santiago Villanueva.
Este operativo desenvólvese no marco dun convenio asinado entre o Ministerio de Defensa e a Xunta de Galicia, de case medio millón de euros, para realizar labores de vixilancia, disuasión e prevención dos incendios en 39 concellos, repartidos nun total de oito distritos forestais que abarcan 4.414 quilómetros cadrados.
O número de patrullas poderá ser ampliable ata 75 no caso de nivel máximo de esforzo, na actualidade o nivel é medio. Os militares despregados no monte tamén facilitarán información aos servizos de extinción e notificarán ás Forzas e Corpos de Seguridade sobre aquelas persoas que puidesen estar implicadas na provocación de incendios intencionados.
O subdelegado do Goberno en Pontevedra remarcou que a "traxectoria efectiva e exemplar" na protección dos montes e da cidadanía neste operativo, levou á creación este ano en Canarias dun operativo "irmán", o Sentinela Canario, que actuará no arquipélago durante este verán. Losada tamén destacou "o compromiso do Goberno para dar resposta a esta problemática mediante a cooperación entre administracións".
Neste sentido, informou de que este ano o Executivo central pon a disposición da Xunta preto de 4.000 efectivos, entre a UME, Brigada de Reforzo de Incendios Forestais (BRIF) de Laza, Terzo Norte da Armada, Exército de Terra, Garda Civil e Policía Nacional.
Pola súa banda, a conselleira do Medio Rural subliñou a importancia da colaboración neste ámbito xa que "a loita contra o lume é cousa de todos". "Apelo ao noso corazón, que en Galicia é verde, para que siga sendo verde", esgrimiu.
María José Gómez lembrou que este ano mobilizaron a máis de 7.000 efectivos para esta finalidade, apoiados por unha trintena de medios aéreos --entre autonómicos e estatais-- e preto de 380 motobombas --da Xunta e municipais--.
Respecto dos militares que participan no Centinela Galego, o xeneral da Brigada "Galicia" VII apuntou que esta operación supón "unha oportunidade" para que os vexan e para que a cidadanía entenda que as Forzas Armadas "son unha magnífica ferramenta ás ordes do Goberno para as necesidades de todos".
