A Xunta aínda non resolveu un concurso público para loitar contra os lumes de 2015

Ou hai moito traballo na Xunta, ou certos concurso públicos están predispostos para que teñan efecto no ano seguinte. Así sucede coa subministración e entrega de produtos químicos para a prevención e defensa contra os incendios forestais do pasado ano. Uns produtos que aínda non chegaron, a pesar de que a campaña contra o lume para o que foron pedidos alá foi.

O pasado 21 de setembro presentábase na plataforma de contratación da Xunta este concurso que non se resolveu a día de hoxe, xa que aínda se está en fase de apertura de ofertas. Trátase de aditivos que se engaden á auga e que se aplican sobre zonas de vexetación que se queren preservar da combustión ou que se descargan sobre os incendios forestais con medios aéreos para aumentar a eficacia da extinción.

Pero estes produtos que eran para loitar, supostamente, contra os lumes do 2015, non chegaron a tempo. Servirán, seguramente, para loitar contra os lumes que haxa no 2016 xa que o seu obxectivo é a extinción de lumes forestais con ataque directo ou indirecto desde medios aéreos e cunha entrega dun mínimo de 40.000 litros deste produto.

O valor do concurso é de 168.000 euros sen IVE e a empresa gañadora tería que facer unha primeira entrega dese produto químico nun máximo de 7 días naturais dende o seguinte á 

sinatura do contrato e entregas sucesivas nun máximo de 36 horas, dende a notificación da entrega.

O que semella que si chegará a tempo para a campaña de verán do 2016 é a subministración en entrega de 2.100 pares de botas de extinción para o persoal do servizo de prevención contra incendios forestais. Un concurso por valor de máis de 205.000 euros sen IVE que saíu a concurso o 15 deste mes de xaneiro.