O Goberno galego continúa privatizando a xestión de dúas das súas webs por máis de 300.000€
Os contidos e o soporte técnico do Portal Galicia Aberta da Secretaría Xeral de Emigración e o Portal Eido Local, da Dirección Xeral de Administración Local, tamén seguirán en mans dunha empresa privada.
Por Galicia Confidencial | Compostela | 31/03/2016 | Actualizada ás 08:00
A Axencia para a Modernización Tecnolóxica de Galicia (Amtega) destinará case 320.000 euros paracontinuar a externalizar os contidos e o soporte técnico de dúas webs da Xunta; o Portal Galicia Aberta, dependente da Secretaría Xeral de Emigración, que ata agora xestiona o Grupo Voz, e o Portal Eido Local, dependente da Vicepresidencia.
Deste xeito, continuarán en mans privadas os servizos de comunicación e información (directorios, foros, novas ou axenda) e das canles de colaboración da Xunta coas comunidades galegas no exterior. Tamén, a relación telemática do Goberno galego cos 315 concellos, as 4 deputuacións e 35 entidades locais.
Segundo o prego de condicións, a empresa adxudicataria deste concurso terá como obxectivos principais a dinamización de contidos, o desenvolvemento evolutivo e o soporte técnico destas dúas webs. Deste xeito, a Xunta deixará en mans privadas as tarefas de actualización continuada dos contidos destes dous portais.
Entre as obrigas do adxudicatario estará unha proposta proactiva de melloras de deseño, funcionais e de organización de contidos, revisión de contidos publicados nos portais “para garantir unha homoxeneidade de estilo e de calidade, e aliñamento co establecido nas políticas web corporativas da Xunta”, a redacción de guías de recomendación, a colaboración na elaboración de contidos do portal e na documentación formativa ou divulgativa e na edición e mantemento dos contidos.
Por outra banda, a empresa gañadora tamén participará nas tarefas de dinamización de contidos con áreas de novas, canles de participación, elaboración de boletíns ou aqueles que xurdan durante a execución do proxecto. Tamén se encargará da publicación diaria de contidos para esas canles e elaborará un plan de dinamización de contidos. Ademais, o adxudicatario terá que realizar o deseño, desenvolvemento e instalacións de novas funcionalidades.
Finalmente, terá que realizar o soporte técnico das incidencias que se produzan nestes dous portais cun tempo máximo de resposta de 60 minutos. A empresa terá que facilitar mensualmente á Amtega un informe coa actividade realizada e os parámetros da calidade dos servizos acadados.
