O alumnado de etnia xitana e de altas capacidades terán programas específicos contra o abandono escolar

A Xunta de Galicia porá en marcha dous novos programas piloto para combater o abandono educativo e promover a permanencia no sistema educativo do alumnado de etnia xitana, así como daqueles mozos que presenten altas capacidades.

As dúas iniciativas, que foron anunciadas este luns polo presidente do Goberno galego na rolda de prensa posterior ao Consello, poranse en marcha no marco dunha nova estratexia de inclusión educativa, valorada en 116 millóns de euros, que estará en marcha ata o ano 2030.

Esta estratexia promoverá acordos entre os Centros de Educación Especial e de Formación Profesional, impulsará as prácticas en empresas para estes alumnos e creará programas formativos adaptados. Tamén haberá accións formativas para os docentes sobre atención á diversidade.

Rueda avanzou que o obxectivo é pór en marcha estes programas no inicio do próximo curso escolar, en setembro, para "blindar así a igualdade de oportunidades de todos e desenvolver as súas potencialidades con independencia das súas condicións".

O titular do Goberno Galego, Alfonso Rueda, na súa comparecencia aos medios este luns. DAVID CABEZÓN | Fonte: Europa Press