Estudantes piden que non se interrompa a súa educación ante crises e emerxencias

Alumnos de catro colexios galegos participaron este venres nun pleno infantil no Parlamento de Galicia, onde puxeron o foco na educación en situacións de emerxencia e esixiron "que se garanta este dereito fundamental e que non se perda cando haxa unha crise".

Durante o acto, enmarcado na Campaña Mundial pola Educación en Galicia --Educo, Entreculturas, Taller Solidario, a Universidade de Santiago de Compostela e Axuda en Acción--, a representante da campaña, Lorena Boga, alertou de que "ante calquera emerxencia, guerra, desastre natural, crise humanitaria ou pandemia, a educación é o primeiro dereito en ser vulnerado e o último en ser reestablecido".

"Os nenos e as nenas non podemos ver interrompida a nosa formación, xa que estariamos a interromper tamén o noso futuro e as nosas oportunidades para a vida", expuxeron Ángela Gallego Rodríguez e Iria Lois Fernández do Colexio Plurilingüe San José da Guía de Vigo. Neste sentido, estudantes do Colexio San José da Guía (Vigo), do CPI Virxe da Cela (Monfero, A Coruña), do CEIP Eusebio da Garda (A Coruña) e do Colexio San José (Lugo), aproveitaron esta xornada no Parlamento galego para pedir seguir aprendendo e formándose "a pesar de circunstancias adversas".

Entre as demandas expostas polos escolares destaca un "plan B" en caso de emerxencia, formación en primeiros auxilios, "simulacros máis aló dos de incendios para mellorar a preparación", así como "garantir a cultura da protección civil entre os membros da comunidade educativa". Estudantes do colexio lucense San José esixiron "coordinación" en caso de emerxencias e instaron aos centros educativos a "vincularse" coa saúde física e mental. "Necesitamos cambios e coordinación porque a educación é o primeiro, é o esencial, non pedimos milagres", aseveraron.

CURSOS PARA PAIS

A fenda dixital foi outra das demandas crave durante a xornada, neste sentido, estudantes do centro de Monfero advertiron de que "hai que solucionar a fenda dixital porque non todas as familias contan con dispositivos adecuados e os pais non están formados".

Por iso, instaron á Administración pública a ofertar cursos para as familias para formar aos pais e nais en competencias dixitais. "Cando en clase nos mandan investigar por Internet algún tema, sabemos que hai compañeiros e compañeiras que non o poden facer. Cremos que se deberían dar subvencións a estas familias, do mesmo xeito que se dan bolsas para libros...", reclamaron.

"TRASLADAREMOS Á XUNTA AS VOSAS PROPOSTAS"

O acto, presidido pola vicepresidenta primeira do Parlamento, María Elena Candia, tamén contou coa participación de representantes dos grupos parlamentarios. Pola súa banda, XulIo Abalde, en representación do Grupo Parlamentario Socialista, avogou por "traballar para que non se establezan diferenzas, non só en situacións de emerxencia senón sempre" e valorou positivamente a proposta dos escolares de formar aos pais en competencias dixitais.

Mentres que a nacionalista María Cristina Fernández, asegurou que a intención do Bloque Nacionalista Galego é "pór en evidencia todas aquelas iniciativas que aos estudantes parécenlles interesantes e que lles preocupan".En representación do Grupo Parlamentario Popular, Cecilia Vázquez, destacou "a importancia de escoitar" e lamentou que "non se fai en exceso". Así mesmo, asegurou aos escolares que "trasladará á Xunta as súas propostas".