Rueda diferencia as manifestacións de Galicia das de Madrid e di que respecta aos que protestan "de boa fe", coma el

O presidente da Xunta, Alfonso Rueda, reivindica que "había moitísima xente" na manifestación que se celebrou este domingo en Madrid en contra do Goberno de Pedro Sánchez, e sinalou que el acudiu "de boa fe" e "non só como presidente do partido en Galicia", senón tamén "como cidadán".

"Como cidadán que cre que así non podemos seguir", precisou, a preguntas dos xornalistas durante a súa comparecencia despois da reunión do Consello da Xunta. Neste sentido, opinou que "a política (...) non pode ser estar a ver a ver canto máis aguanta o presidente do Goberno" e engadiu que desde o seu punto de vista "a situación política é insustentable e o mellor é dar a voz aos españois e aos galegos e que poidan decidir se queren seguir así ou un cambio de rumbo".

Ademais, criticou "este empeño" de "tantos ministros que saíron onte" a pronunciarse sobre a manifestación, e que, segundo censurou, ata ese momento "estiveron calados con todo o que se estaba sabendo do Partido Socialista". Para Rueda, é "moi revelador de que o que estaban a dicir", en relación a se foi unha manifestación "inocua" ou "unha picada". "Había moitísima xente, eles sábeno. e o seu empeño é moi revelador", recalcou.

Nesta liña, criticou que "esta lexislatura comezou sendo inútil e estase convertendo en absurda" e rexeitou "estar a esperar a ver que fai" Pedro Sánchez, ao que viu en "un búnker" e do que censurou que "non se aproba un orzamento, non se aproba unha medida, levan cousas a votar e non saen..."

Cuestionado en concreto sobre as súas críticas a manifestacións convocadas en Galicia, respondeu que respecta aos manifestantes "cando van de boa fe" e indicou que así ía el este domingo. "A repetir o mesmo que lle dixen fronte a fronte ao presidente do Goberno en Barcelona. Que isto non pode seguir así e que se pronuncien os cidadáns a través dunhas eleccións", resolveu.

CRÍTICAS A SÁNCHEZ

Pola súa banda, o presidente da Xunta, Alfonso Rueda, acusou a Pedro Sánchez de "case buscar" que "non houbese" acordos na conferencia de presidentes, o que, ao seu xuízo, "retrata o que é agora mesmo o Goberno central".

Na rolda de prensa posterior ao Consello da Xunta, Rueda foi preguntado pola conferencia e lembrou que nas últimas ás que acudiu co líder do PP, Alberto Núñez Feijóo, á fronte do Executivo autonómico e con José Luís Rodríguez Zapatero como presidente do Goberno "preparábanse con tempo e chegábase a acordos".

Agora, censurou, o "fracaso absoluto" da semana pasada "retrata o estado actual deste goberno e as perspectivas que quedan de lexislatura". Neste sentido, referiuse a o financiamento autonómico e insistiu en que cre que Sánchez "buscaba unha foto" e "tapar outras cousas" desde o momento da convocatoria.